Марий Элыште «Чодыра гыч лекташ полшышо стрелке-влак» проект илышыш шыҥдаралтеш.
Тудым Марий аварийно-утарыше службын шулдыр йымалныже улшо утарыше отрядлаш ушнышо ӱдыр-рвезе-влак шуктат. Нуно чодыра лоҥгасе корнывожлаште шинчаш перныше указатель-влакым вераҥдылыт. Чодыраште улшо еҥ-шамычлан йомаш огыл манын, эн лишыл лекме корным ончыктат. Мо оҥайже, указательыште координатат ончыкталтеш. Тидыже утарыше службыш йыҥгыртыме годым увертараш пеш кӱлешан лиеш.
Указатель-влакым пушеҥгыш кок метр деч кӱшкырак вераҥдат, а координат нерген уверым – шинча тураште. Кызытеш «Марий чодра» заповедник йыр 14 тыгай указательым вераҥдыме. Молан лач тушко? Марий аварийно-утарыше службын специалистше-влакын палемдымышт почеш, лач тушто еҥ-шамыч утларак йомыт.
Ты паша умбакыжат шуйымо лиеш. Лишыл жапыште нуным Суслоҥгер, Силикатный посёлкыла, Кучко да Шап ял воктене вераҥдат.
С. Носова
