Кодшо идалык мучаште Марий Эл Республикын Пӱртус поянлык, экологий да йырым-йырысе средам аралыме министерствыжын кугыжаныш инспекторжо-влак чодырам закондымын руымым тергеныт.
Чылаже 200 наре рейдым эртареныт. Тышеч кудло нарыжым — правам аралыше орган-влакын пашаеҥышт дене пырля. пушенгым закондымын руымо кум случайым тӱжваке луктыныт. Тыге чодыра фондлан ыштыме эҥгек 9115 теҥгешке шуын. Титакан-влакым закон дене келышышын, мут кучаш шогалтеныт. Весымат палемден кодыман: кодшо идалык мучаште чодыра участкылам арендоватлыше оза-влак У ий паремым сӧрастараш полшышо 4881 изи кожым руэныт. Ты шотышто законым пудыртышо-влак лийын огытыл.
С.Носова.
