КУЛЬТУР ДА ИСКУССТВО

Черемис

Пытартыш кок ийыште марий калыкын чоныштым тарватыше ик эн кӱдыралтле мурылан «Черемисым» шотлыман. Тудым Марий Элын калык артистше Вячеслав Созонов йоҥгалтара. Мутын авторжат шкежак. Семым эргыже, опер да балет театрын дирижёржо, Григорий Архипов келыштарен. Эртыше кечылаште тудо мурылан видео клипым войзеныт. Сценарийын авторжо, художник постановщик – Иван Богомолов, режиссёр, оператор да монтажёр – Роман Сазанов, аранжировко — Александр Куприяновын. Аэросьёмкым Борис Адиятуллин ыштен.

«Черемис» мут сарзе айдемым ончыкта. Марий-влак шкеныштым тыге лӱмден огытыл да тиде мут деч кораҥыныт гынат, тудо садак кодын. Мут шуко еҥлан игылтме семынат чучын. Тиде чын огыл маннем. Эше ик шонымашем уло: иктаж кӱкшӱ верыште мемнан кугезе сарзе еҥлан, черемислан, чапкӱм шогалташ. Мый ты шарныктышым тыге ужам: самырык сарзе еҥ шога, шеҥгелныже имньыже шудым кочкеш. Рвезе тудын деке эҥертен шогалын да тораш онча. Тиде марий калыкым иктыш ушышо символ лийын кертеш», — палдарен МЭТР телерадион журналистшылан автор. «Чер», «сар», «царь» мут-влак ик мутвож гыч шогат. Черемис манмеке, вожылман огыл, а мӧҥгешла – кугешныман. Тидланже калык историйым шымлаш кӱлеш.

Ачам тошто да кызытсе илышым сылнымут корнышто сайын почын пуэн. Почеламут пеш виян, садлан сем куштылгын «шочын». Ты мурылан «шӱлышым» ачам дене пырля пуымо. Ончыч Йошкар-Олаште видео войзалтын, вара сёмочный группо дене Волжск кундемыш кудалме. Клипым сниматлыме паша ик кечым налын. Тушто мемнан родо-тукым, лишыл изак-шоляк-влак сниматлалтыныт. Ӱжмӧ актёр уке. Тиде гочын ме ешнан марий калык, историй, тӱвыра деке кылжым ончыктынена», — увертарыш Григорий Архипов. Видео сӱрет Марий Элын 100 ияш лӱмгечыжлан пӧлеклалтын.

О.МОШКИНА

Опубликовать в Одноклассники

Добавить комментарий