КУЛЬТУР ДА ИСКУССТВО

«Чарла альбом» — икымше гана

Йошкар-Оласе Чарла кремльыште «Чарла альбом» тӱвыра-исторический фестиваль икымше гана эртен.

Тиде ойыртемалтше мероприятий концерт программе гыч веле огыл шоген. Муро, почеламут коклаште истрий да науко дене кылдалтше тат-влакат лийыныт, толшо-влак шуко уым пален налыныт. Тидлан Российысе военно- исторический обществын региональный пӧлкажлан туаштыман. Фестиваль Йошкар-Олан 435 ияш лӱмгечыжлан пӧлеклалтын ыле. «Исторический шарнымаш» лекторият ты кече гычак шке кокымшо тургым идалыкшым тӱҥалын.

Мероприятийым почмашке Марий Эл Правительстве председательын икымше алмаштышыже Михаил Васютин, Российысе военно-исторический обществын регионысо  пӧлкажым вуйлатыше Евгений Кузьмин толыныт ыле. Палемден кодыман, ты пӧлкажым республикыште  идалык ончыч 13 сентябрьыште ыштыме.

Фестиваль сайын эртыш. Погынышо-влак ончылно «Царёв город» фольклор ушем, лӱмлӧ опер мурызо Александр Столбов, И.С.Палантай лӱмеш  тувыра да сымыктыш колледжын студентше-влак мастарлыкыштым ончыктеныт. Калуго гыч лӱмын Ший курымысо поэзийым шымлыше да журналист Дмитрий Кузнецов толын ыле. Тудо Йошкар-Олалан пӧлеклыме почеламутшым сцене гыч лудо. А лектор семын историй науко доктор, МарГУ-н профессоржо Сергей Стариков, МарНИИЯЛИ-н   научный сотрудникше Алексей Кудрявцев, МарРГУ-н Археологий тоштержым вуйлатыше  Александр Соколов да оласе историй тошерын пашаеҥже-влак лийыныт.

Тыгай фестивальым эше кодшо ийынак, лекторийым эртараш тӱҥалме годымак палемденыт улмаш. А лекцийжылан кӧра рӱдолштына илыше кажне еҥ тылзылан ик гана шочмо кундемнан историйже нерген утларак пален налын кертеш.

 С.НОСОВА

 Снимкылаште: фестиваль годым.

 М.Скобелевын фотожо.

Опубликовать в Одноклассники

Добавить комментарий