2021 ий 6 сентябрьыште марий писатель, прозаик, поэт, журналист да редактор, Россий писатель ушемын да Россий журналист ушемын еҥже, Марий Элын калык поэтше Юрий Иванович Галютин-Ялзак мемнам коден кайыш.
Юрий Иванович 1940 ий 1 майыште Морко район Усола ялыште служащий ешеш шочын. 1958 ий гыч 1960 ий марте Н.К.Крупская лӱмеш Марий кугыжаныш педагогике институтышто тунемын.
Умбакыже Марий Турекысе «Знамя» райгазет, «Марий коммуна» газет, «Пачемыш» журнал редакцийлаште, Марий книга издательствыште пашам ыштен, ятыр ий «Марий Эл» газет редакцийыште культур да литератур пӧлкам вуйлатен. «Ончыко» журналын сылнымут редакторжо лийын.
Икымше сылнымут произведенийже-влакым Ю.Галютин школышто тунеммыж годым возен, нуно районысо, республикысе газет ден журналлаште савыкталтыныт. 1969 ийыште «Ит ӧпкеле» икымше почеламут сборникше лектын.
Юрий Иванович Галютинын ӱмыр лугыч лиймыже – марий культурылан пӧртылташ лийдыме йомдарымаш. Лишыл да родной еҥже-влаклан чаманымашнам каласена. Тудо ойыртемалтше профессионал, талантан писатель, поэт да журналист лийын. Лишыл еҥын илыш дене чеверласымыже – тиде кугу ойго да неле нумалтыш.
Ӱмыржым чын да чап дене шуктышо, шкеж почеш поро паша саскам кодышо айдеме нерген эн волгыдо шарнымаш илаш тӱҥалеш.
Профессионал корныштына тудо мыланна волгыдо корным виктарыше лийын кодеш. Шӱмыштына эн волгыдо шарнымаш аралалташ тӱҥалеш.
М.З.Васютин, К.А.Иванов, М.И.Матвеев, И.Г.Садовин, А.С.Абдулов, Э.А.Иманаев, Л.П.Ягодарова, С.Д.Архипова, Ю.И.Соловьев, И.Г.Попов, Г.Л.Сабанцев, А.Т.Тимиркаев, В.Н.Бердинский, И.И.Лобанов, А.А.Богданов, В.М.Горохов, Л.Л.Яндаков, Е.А.Юнусова, Ю.В.Цветкова.
