16 сентябрьыште Российын калык сӱретчыже, Марий АССР искусствын сулло деятельже Зосим Фёдорович ЛАВРЕНТЬЕВЫН шӱмжӧ кырымым чарнен.
Зосим Фёдорович 1933 ий 6 апрельыште Курыкмарий район Эсансола ялеш шочын-кушкын.
З.Лаврентьев пӱртӱсым сӱретлаш моткоч йӧратен. Тудын произведенийже-влакым Российыште веле огыл, йот эллаштат сайын паленыт. Сӱретче марий сӱретсымыктышым вияҥдымашке кугу надырым пыштен. Лач тудо республикыштына Кугу Отечественный сарын да пашан ветеранже-влакын сӱрет галерейыштым почын. Тудо графике пашаж денат ойыртемалтын, ятыр книгалан иллюстрацийым, койдарчык графикым ямдылен. 1960 гыч 1971 ий марте «Пачемыш-Оса» журналын художественный вуйлатышыже лийын. Тиддеч посна «Крокодил», «Капкан», «Чаян», «Вожик», «Хэнек» журнал ден газетла дене кылым кучен. Марий книга издательствын савыктен лукмо 147 книгажым сӧрастарен.
Искусство тӱняште да мер пашаште тыршен ыштымыжлан З.Лаврентьев ятыр медаль, почетан грамот, диплом дене палемдалтын.
Поро кумылан, мыскарам йӧратыше да чон йодмо пашажым уло кумылын шуктышо, талантан сӱретчын ош тӱня дене чеверласымыжлан кӧра меат чот ойганена да родо-тукымжо, лишыл еҥже-влаклан чаманымашым ойлена.
Кийыме верда пушкыдо лийже, Зосим Фёдорович.
«Марий Эл» газетын
икоян ешыже.
