Кодшо арнян Йошкар-Олаште «Христиан просвещений да руш тӱвыра» темылан пӧлеклалтше шымше Мироносицкий лудмаш эртен.
Тудым почмаште Марий Элын тӱвыра, печать да калык-влакын пашашт шотышто министр К.Иванов, тудын алмаштышыже Г.Ширяева, образований да науко министр Н.Адамова, самырык-влакын политикышт, спорт да туризм министр Л.Батюкова, Марий Эл вуйлатыше пелен йочан праваже шотышто уполномоченный Е.Бурдо да молат лийыныт.
Кажне ийын эртаралтше ты лудмаш тӱрлӧ министерстве ден ведомствым, туныктышо, социальный да приходласе пашаеҥ-влакым ушышо ик эн кугу черке-мер форумыш савырнен. Константин Ивановын палемдымыже почеш, ты лудмаш — республикыштыжат культурный да социальный шӱлышан ик эн авторитетный духовно-просветительский форум. Тудо мер илышыште лектын шогышо ятыр пӱсӧ йодышымат решатлаш полша.
Мироносицкий лудмашын председательже, Йошкар-Ола да Марий митрополит Иоанн Марий епархийын 25 ияш лӱмгечыжлан пӧлеклалтше докладым ыштен. «Тиде 25 ий жапыште мыланем да епархийлан шагал огыл нелым чытен лекташ да куанашат логалын. Но рӱдоланан тӱжвал сынжым тӱзаташ, черке пашам шукташ юмо эре полшенак шоген. Ты лудмашат кажне православный еҥлан у шӱлышым пуа манын ӱшанем…» — каласен митрополит.
Сар деч ончычсо марий викариатстве нерген вес докладым Волжск да Шернур епископ Феофан ыштен. Митрополийын кусарыше комиссийыжым вуйлатыше протоиерей Николай Чузаев комиссийын шуктымо пашаже дене палдарен.
Тӱҥ доклад-влак деч вара Марий епархийыште руш православный черке пашаште ойыртемалтше клирик ден мирян-влакым палемденыт. Нунылан митрополит Иоанн Руш православный черкыште патриаршествым угыч ыштымылан 100 ий темме лӱмеш медальым да архиерейын грамотыжым кучыктен.
А вара лудмаш шке пашажым секцийлаште шуен. Тушто куд тӱрлӧ йодышым тарватеныт: черке муро, православный лудмывер, тӱвыра, сылнымут, йоча-влакын шӱм-чон поянлыкыштым пойдарымаш да молат.
А теве митрополий пелен пашам ыштыше айык йӱла илышлан кумылаҥдыше обществе посна секцийыште пашам ыштен. Тушто ты организацийын пашаже дене палдарымаш эртен. Приходласе социальный пашаеҥ, тыгак милосердий сестра-влаклан посна «йыргешке ӱстел» йыр мутланымаш эртаралтын.
Вес кечынже Мироносицкий лудмаш вес учережденийлаште шке пашажым шуен. Мутлан, Национальный президент школышто самырык богослов-влакын лудмашышт, Марий кугыжаныш университетыште самырык-влакын конференцийышт эртеныт. Православий тоштерыште миссионер пӧлкан секцийыже пашам ыштен.
С.Носова.
