27 мартыште физкультур ден спортым вияҥден колтымо шотышто РФ президент пеленысе советыште элнан президентше В.Путин «Физкультур – политический задаче» манын палемден.
Ты гана совет синхронный иймаш дене Олимпийский рӱдерыште погынен. Олимпийский чемпион Анастасия Давыдова ден Москван мэрже Сергей Собянин В.Путинлан спортсмен-влакын кушто да кузе тренировкым эртымыштым ончыктеныт да синхронный иймашын вияҥмыж нерген каласкаленыт.
А тренажёр залыште президент шукерте огыл эртыше Теле универсиадын сеҥышыже-влак дене вашлийын. Пытартыш Олимпиадыште Российын могай умылыдымаш дене вашлиялтмыжым чылан шарнат.
– Допинг дене кучедалмаште Россий чыла требованийым шуктен. 2020 ийыште Токиошто эртышаш Олимпиадыште мемнан сборный командылан нимогай чарак лийшаш огыл. Адакшым спортым политике дене ушаш шонышо-влаклан Россий ваштареш шогалаш амалым пуышаш огынал, – палемден В.Путин. – Тӱшка спортлан кугурак тўткышым ойырыман. Профессионал-влак ты шотышто оксам налыт гын, любитель-шамычлан – кугыжаныш полыш гына. 2024 ийлан элыштына 55 процент калык физический культур да спорт дене кылым кучышаш. Тидыже мемнан национальный задачыланна шотлалтеш. Физкультур – тиде кугыжаныш, политический задаче. Тиде сферылан 137,2 миллиард теҥге окса ойыралтеш.
Е.Эшкинина.
