Олмыктымо деч вара У Торъял районысо Кугу Лумарий ФАП угыч пашам ышташ тӱҥалын.
Тудым 30 ий ончычак чоҥымо улмаш. Кодшо чот луман ийын ФАП-ын леведышыже волен каен, сандене фельдшерлан пациент-шамычым верысе школын ик классыштыже приниматлаш логалын. Тылеч посна районысо рӱдӧ эмлымверын специалистше-влаклан верыш лектын, пашам ышташ йӧн лийын огыл.
Тидымак шотыш налын, У Торъял районысо рӱдӧ эмлымверын озанлык службыжо ремонтым тӱҥалын. Тыге, леведышым олмыктымо, пӱртӱс газым пуртымо, зданий кӧргым ачалыме, утларак йӧнлын кыдежлыме, окнам вашталтыме, моло тыгыде пашамат шуктымо. Шушаш ийын ФАП-ын технический состоянийжым умбакыже саемдаш палемдыме.
Фельдшер Ирина Аркадьевна Сидоркина тиде кундемыште 500 наре еҥым обслуживатла. ФАП-ым олмыктымо да канде тул дене ырыкташ тӱҥалме деч вара районысо специалист-шамычланат пациент-влакым тергаш утларак йӧнан лийын, верлашке лектын коштшо поликлиникат тиде ялыш толын каен.
Кугу Лумарий кундем калык У Торъял районысо рӱдӧ эмлымверым вуйлатыше-влаклан да Масканур ял шотан илем администрацийлан ФАП-ым олмыктымыштлан да утларак йӧнаным ыштымыштлан нимучашдымын таушта.
М.ИВАНОВА.
