27 октябрьыште 2019-2028 ийлан Марий Эл Республикын Чодыра план проектшым пеҥгыдемденыт. Тидын шотышто совещанийым республик вуйлатыше А.Евстифеев эртарен.
Проект 200 наре лаштыкан. Тушко 2009-2018 ийласе Чодыра планым шуктымо анализым, регионын чодыра фондшым кугемдыме да арален кодымо дене кылдалтше паша планым, республикысе чодыран кызыт могай состоянийыште улмыж нерген данныйым, молымат пуртымо.
Документым каҥашыме годым республик вуйлатышын темлымашыжым шотыш налыныт. Мутлан, идалыкыште чодырам мыняр кумдыкышто руаш лийме, тыгак пум ямдылаш ойырымо да арендыш пуымо участке дене пайдаланымылан бюджетыш пурышо окса, кичкым ямдылыме, росотам куштымым шукемдыме дене кылдалтше кӱштымашым.
Корным саемдыме йодышымат нӧлталме. А.Евстифеевын мутшо почеш, кажне ийын 60 километр марте у чодыра корно ышталтшаш, 140 километр наре уэмдалтшаш. А теве обрабатыватлыдыме чодырам, «круглякым» регион гыч ӧрдыжкӧ шупшыктен лукмым шагалемдыман. Регион вуйлатышын палемдымыж почеш, Марий Эл гыч тыгай чодыран нылымше ужашыжым наҥгаят, садлан тиде пашам 10 процентлан иземдаш темлыме.
2019-2028 ийлан Марий Эл Республикын Чодыра план проектшым Чодыра озанлыкын федеральный агентствышкыже колтат. Исполнительный кучемын уполномоченный федеральный органыштыже планым сайлан шотлат гын, Марий Эл вуйлатыше документым пеҥгыдемда.
Марий Эл вуйлатышын организаций да аналитике виктемжын уверже негызеш Л.ШАБДАРОВА ямдылен.
