Марий Турек районысо Марий Пыламарий селаште фельдшер-акушер пунктым нӧлташ тӱҥалыныт.
Тиде объект «Здравоохранений» национальный проектын «Первичный медико-санитарный полышым пуымо системым вияҥдымаш» регионысо проектшым илышыш пуртымо кышкарыште Марий Элыште 2020 ийыште чоҥаш палемдыме 17 ФАП гыч иктыжлан шотлалтеш.
У ФАП-ым ончычсо медпункт олмыштак чоҥат, тудыжым чот тоштеммыжлан кӧра рончымо.
Марий Пыламарий селасе ФАП Марий Пыламарий ден Манылово селалаште, Ошлан ден Хозино яллаште илыше 800 утла еҥым, ты шотыштак 123 йочам обслуживатла. ФАП-ым 25 ий наре паша стажан акушерке Алевтина Тихомирова вуйлата. А фельдшер Ольга Кучергина ынде 11 ий медициныште тырша.
М.ИВАНОВА
