КУЧЕМ УВЕР

У технологийлан эҥертат

Марий Элыште тӱҥ федеральный инспектор П.Журавлёв регионыштына «Лӱдыкшыдымӧ ола» аппаратно-программный комплексым вияҥдыме, калыкын да организаций-влакын обращенийыштым налме да нуным ончымо пашам саемдыме шотышто совещанийым эртарен. Нине йодышым каҥашымашке Марий Эл правительстве председательын икымше алмаштышже С.Сметанин, Верховный суд председательын пашажым шуктышо С.Бабин, Калыкым аралыме да гражданский обороно комитетын председательже В.Карпов ушненыт.

Еҥ-влакын йодмашыштым налме шотышто тений у технологийым утларак кучылтмым палемденыт. Мутлан, кугыжаныш органлашке Интернет гоч возалташ йӧн уло. Марий Элыште кугыжаныш кучем орган, верысе самоуправлений, кугыжыш учреждений-влакын 241 официальный сайтышт пашам ышта. 185 сайтыште граждан-шамыч йодмашым электрон почто гоч колтен кертыт.

«Лӱдыкшыдымӧ ола» АПК регионышто 2009 ийыште  илышыш шыҥдаралташ тӱҥалын. В.Карповын мутшо почеш, тений республикыште ты системылан кӧра Йошкар-Олаште 251, Волжскышто 6 видеокамер пашам ыштат. Нунын полшымо дене пытартыш вич ийыште 15 тӱжем административный правонарушенийым ыштымым пален налме, 130 преступленийым почмо.

Л.ШАБДАРОВА.

Опубликовать в Одноклассники

Добавить комментарий