23 октябрьыште Марий Эл вуйлатыше Александр Евстифеев Россий правительстве председательын алмаштышыже Татьяна Голикован эртарыме селекторный совещанийыштыже лийын.
Тушто кум ияш марте икшыве-шамычлан образовательный организацийыште ешартыш верым ойырымо нерген мутланеныт. Тыгак «Образований» ден «Демографий» национальный проектлам илышыш шыҥдараш тӱҥалмым каҥашеныт. Нине кок проект – «Кум ияш марте икшывылан школ деч ончычсо образованийым налаш йӧным ышташ – ӱдырамашлан пашаш лекташ йӧным пуымаш» федеральный проектеш кышкарлалтын.
Т.Голикова регионлаште кум ияш марте икшывылан йочасадлаште верым шукемдымым сай могырым палемден. Тудын мутшо почеш, тиде программе тений гыч гына пашам ышташ тӱҥалын гынат, регионлаште пашам кыртмен ыштымылан кӧра сай могырыш вашталтме шижалтеш. 2017 ий 1 октябрьлан йочасадлаште кум ияш марте икшывылан верым 75,8 процентлан ситарыме гын, 2018 ий 1 октябрьлан тиде чот 79,2 процент марте кушкын. Лишыл кум ийыште Россий правительстве кум ияш марте йочалан верым тичмашын ситараш палемден.
Кызыт ведомственный программе кӧргыштӧ эртарыме мероприятий-влак вес ийын «Демографий» нацпроектыште шыҥдаралташ тӱҥалыт. Тидыже ясельный верым шукемдаш полшышаш, кум ияш марте икшыван ава-шамычлан пашаш лекташ сай йӧным ыштышаш, йоча шочмым кугемдышаш.
Россий Просвещений министерстве ден Марий Эл правительстве коклаште ойпидышым пеҥгыдемдыме. Тудын дене келшышын, йочасадлам чоҥаш федеральный бюджет гыч 618 миллионат 301 тӱжем теҥгем ойырат. Тидыже образовательный тӧнежлаште кок тылзаш гыч кум ияш марте икшывылан 1092 ешартыш верым ойыраш полша.
Республикнан Образований да науко министерствыжын палемдымыж почеш, субсидий Йошкар-Олаште, Волжск олаште, Медведево районышто вич йочасадым чоҥаш кая. Рӱдолаште «Восточный» ден «Интеграл» микрорайонлаште 320 веран йочасадлам, тыгак 49-ше №-ан «Лесная сказка» йочасад пелен 80 веран ешартыш оралтым нӧлтат. Волжск оласе «Машиностроитель» микрорайонышто 320 веран йочасад лиеш. Медведево посёлкышто ойырымо шийвундо дене оралтым налыт. Тудым варажым 52 веран йочасадлан келыштарат.
«Демографий» проект дене келшышын, йоча дене кум ий марте отпускышто шинчыше ӱдырамаш-шамычлан Марий Элын Паша да калыклан паша верым ситарыме шотышто департаментше профессиональный туныктымаш дене кылдалтше мероприятийым эртараш тӱҥалеш. Тидлан 10 миллион теҥгем ойырат. Ты окса 400 еҥым туныкташ ситышаш.
Селекторный совещаний деч вара, вес кечынже, Марий Эл вуйлатыше А.Евстифеев кум ияш марте икшыве-шамычлан образовательный организацийыште ешартыш верым ойырымо дене кылдалтше посна совещанийым эртарен.
Тудын мутшо почеш, 2021 ий марте, Россий Президентын кӱштымашыж дене келшышын, кум ияш марте икшывылан йочасадлаште верым тичмашын ситарыман. Марий Эл правительстве тиде кӱштымашым шукташ ямде. Йочасадым чоҥашлан федеральный бюджет гыч ойырымо окса дене пырля республикын правительствыже тыгак кӱлеш шийвундым ойыра.
Тений федеральный бюджет гыч ойырымо шийвундо гыч чоҥымо пашалан 195 миллионат 488 тӱжем теҥгем кучылтыт гын, 2019 ийыште – 422 миллионат 813 тӱжем теҥгем.
2021 ий мучаш марте Марий Элыште 12 йочасадым чоҥаш палемдыме. Нунын коклаште йӧршын у йочасад, тыгак улшо учреждений пелен ешартыш оралтат. Тыге йочасадлаште 2080 икшывылан вер лектеш. Тушеч – кум ияш марте 770 ньогалан.
Александр Евстифеев правительствын еҥже-влаклан тарватыме йодышлам контрольышто кучаш, нелылык лекме годым полышым йодаш каласен.
Марий Эл вуйлатышын организаций да аналитике виктемжын уверже негызеш Л.ШАБДАРОВА ямдылен.
Д.Речкинын фотожо.
