Пеҥгыде коммунал шӱкшакым погымо да лукмо системыш куснымо дене илышыштына мо вашталтын, у реформо кузе вияҥеш?
«Благоустройство» ООО-н директоржо Наиль Исхаковын мутшо почеш, паша сайынрак вораныже манын, республикысе Козьмодемьянск ола да Курыкмарий район деч моло кундемлаште пеҥгыде коммунал шӱкшакым погаш кызытсе жаплан келшыше 800 евроконтейнерым налме. Тудым Йошкар-Оласе шуко пачеран пӧртла воктек да частный секторлашке, тыгак Звенигово районысо Суслоҥгер ден Мочалище посёлкылашке вераҥдыме. 80 наре контейнерым Марий Турек районыш наҥгайыме. Тиде кундемыште тымарте ик контейнерат лийын огыл, калык шӱкшакым мешакыш поген.
Но тиде тӱҥалтыш гына. Шӱкшакым погымо контейнерым умбакыжат налаш да чыла кундемыш вераҥдаш палемдыме.
Кызытсе жаплан келшыше контейнер-влакым обслуживатлаш 11 единице спецтехникым налме. Тылеч посна чыла районышто шӱкшакым шупшыктышо-влак дене ойпидышым ыштыме. Тыге, «Благоустройство» ООО-н обслуживатлыме кундемлашкыже эше 76 единице спецтехникым ушымо.
Шӱкшакым тояш келшыше 13 объектыште ойпидышым ыштыме. Йошкар-Олаште да Медведево районышто пеҥгыде коммунал шӱкшакым ойырымо цех-влакым почмо.
М.ИВАНОВА.
