Тений шошым карантин годым калык канен, а мемнан саскам шындыме тургым лийын – ме кажне кечын пашам ыштенна. Тыршымына арам лийын огыл — пареҥге сайын кушкын, адакше тудын акшат тений кугу. Йоча-влак тунам мӧҥгыштак тунемыныт гын, шуко сомылым икшывына-влак дене пырля тӧрленна.
Шушаш ийлан эн тӱҥжӧ – чапле саскам ончен кушташ, у сортлам тергаш, пареҥге куштымо технологийым саемдаш. Мо уло, тудым аралаш.
Шергакан марий калык! У Торъял пошкудо-влак! А.В. Ивановын фермер озанлыкше да шке лӱмем дене тендам шушаш У ий да Рошто пайрем дене шокшын саламлем! Чон ласкалыкым, тынысле кавам, пеҥгыде тазалыкым тыланем. Пеленда эн йӧратыме да йӧратыше лишыл еҥ-влак лийышт. Шонен пыштыме кеч-могай пашада куштылгын шукталтше да лектыш дене куандарыже.
1 январьыште мемнан ешыште эше ик пайрем – авана, Людмила Яковлевна ИВАНОВА, шочмо кечыжым палемда. Тудо Тошто Торъял почто отделенийыште 25 ий наре вуйлатышылан тыршен. Кызыт пенсийыште гынат, кажне кечын мемнан фермер озанлыкыште полша. Тау тыланет, авай, мемнам кумда илыш корныш лукметлан. Пиалан илышым, пеҥгыде тазалыкым да кужу ӱмырым тыланем. Саламлымашке тыгак пелашет, кок эргыч, кок шешкыч, куд уныкат ушнат.
Н.В.Иванова,
Тошто Торъялыште шке озанлыкым вуйлатыше, пареҥгым куштышо
