Марий Эл Республикыште илыше пагалыме еҥ ден уна-влак!
Тендам телымсе эн волгыдо да йӧратыме пайрем-влак – У ий да Рошто дене саламлем!
Нине кечылам ме кеч-кунамат шӱм-чон пырткен, поро вашталтыш лийшашлан да шонымына шукталтмылан ӱшанен, вучена. У ий вашеш россиян-влак кеч-кунамат кумылым нӧлтышӧ сомылым шуктен куржталыштыт, суртышкышт пайрем кумылым пурташ, воктенышт улшо еҥ-влакым куандараш, чоным ырыктыше увер дене палдараш тыршат.
2020 ий куштылго лийын огыл. Тӱнялан у лӱдыкшӧ лектын, шучко вирус ваштареш кучедалмашке пеш кугу вийым виктарыме. Республикыште илыше еҥ-влак чак чумырген шогымыштым да сӧрасен илымыштым, ответственностьым умылымыштым, поро кумылан да лишыл еҥ ден родо-тукымлан веле огыл, полышым йодшо йӧршын палыдыме еҥ-влакланат полшаш ямде улмыштым уэш ӱшандарен ончыктеныт.
Нелылык шуко лийын гынат, мучашке лишемше ий кӱлешан событийлан поян лийын. Тиде ийыште ме Марий Элым ыштымылан 100 ий теммым палемдышна. Кундемна курымаш лӱмгечыжым кугу сеҥымаш дене вашлийын, шуко шотышто ӱшанлын кушкын толмынам ончыктен. Тыгай сеҥымашыш Россий Федерацийын Президентше В.В.Путинын тӱҥалтышыж почеш палемдыме национальный проект-влаклан кӧра шуын кертме.
Республикын Правительствыжын социально-экономически вияҥмаш шотышто ойырен налме стратегийже сай лектышым пуа. Мучашке лишемше ийыште Йошкар-Олаште кум ий жапыште кандашымше йочасадым пашаш колтымо, 30 ий жапыште 825 веран икымше школ почылтын, Волжск олаште школын тунемме у корпусшым чоҥен шуктымо. Медицине ӱшанлын вияҥеш: Козьмодемьянскыште поликлинике почылтын, Йошкар-Олаште кызытсе жаплан келшыше перинатальный рӱдерым чоҥаш тӱҥалме, республикысе муниципальный образованийлаште 17 ФАП лишыл жапыште почылтеш. Вашталтыш моло отрасльлаштат лийын шога: агропромышленный комплекс вияҥеш, автомобиль корно-влак ышталтыт, культур учреждений-влак уэмыт, жилищно-коммунальный инфраструктурын объектше-влак саемыт. Чыла тидыже республикысе калыкын илышыжым йӧнанракым да сайракым ыштымашке виктаралтын.
Шерге таҥ-влак! Кужу жап вучымо тиде пайрем кечын чыла нелылык мондалтше, шӱм-чонлан ласка лийже, тендан йыр йӧратыме еҥ-влак гына лийышт манын тыланыме шуэш. Тек шушаш У 2021 ий кажне пєртыш ласкалыкым, ваш-ваш умылымашым, пиалым да йӧратымашым конда!
Чыла еҥлан тыныслыкым, сӧрасымашым, улан илышым да чыла порым тыланем!
Марий Эл Республикым Вуйлатыше А.А.Евстифеев
