16 декабрьыште Марий Элым вуйлатыше Александр Евстифеев Звенигово олаште тулык да ача-ава ончымо деч посна кодшо йоча ден аварий шотан пӧрт гыч кусарыме еҥ-влаклан у пачер сравочым кучыктен.
Лишыл жапыште нине еҥ-шамыч ола кыдалне чоҥымо вич пачашан шуко пачеран у пӧртыш илаш куснат – нунылан тушто 58 пачерым налме.
Марий Элым вуйлатыше у пачер оза-влакым куанле событий дене саламлен да школ, йочасад, кевыт, каналтыме кумдык гай кӱлешан чыла инфраструктурын пӧрт воктенак верланымыж нерген палемден.
«Тулык да ача-ава ончымо деч посна кодшо 17 йочалан тиде – икымше шке илыме вер. А нылле ик ешлан – шӱкшӧ пӧрт гыч куснышо-шамычлан – тошто илыме верым кызытсе жаплан келшыше да чыла шотыштат йӧнан пачерлан вашталтыме кужун вучымо тат. Йӧрдымӧ илыме фондым пытарымаш, тулык йоча-шамычлан илыме верым ситарымаш – элын президентше Владимир Владимирович Путинын ик эн ончыл верыш шындыме задачыже», — палемден А.Евстифеев.
Ты направлений дене республикын правительствыже пеш кугу пашам шуктен толеш. Тыге, Звениговышто 2019-2020 ийлаште аварий шотан 16 пӧртысӧ 112 пачер гыч калыкым сай илыме верыш кусарыме. Тулык да ача-ава ончымо деч посна кодшо йоча-влаклан ойырымо пачер чотат ий еда кугемеш.
«Самырык-влаклан, поснак ача-ава полыш деч посна кодшо-шамычлан, шке илыме верым налаш куштылгыжак огыл. Кугыжаныш велым тыгай полыш кӱлешан да чын», — каласен регионым вуйлатыше.
А. Евстифеев, у пӧртыштӧ шокшо да ласка лиймылан ӱшанен, пачер оза-влакым шушаш У ий дене саламлен.
«Телын тиде чапле пайремжым эн лишыл еҥ-шамыч дене вашлийыт. У да йӧнан пачерыштыда пиалым тыланем», — манын А.Евстифеев.
Марий Элым вуйлатышын организаций да
аналитике виктемжын уверже негызеш
М.ИВАНОВА ямдылен
