15 декабрьыште Марий Элын Рӱдӧ сайлымаш комиссийже республикын 17 территориальный избирательный комиссийжын составшым да нунын председательыштым палемден.
Территориальный комиссийлашке 159 верыш 168 темлымаш пурен. Тышеч кандидатуржым «Единый Россий», «КПРФ», «ЛДПР», «Справедливый Россий», «Яблоко» политический партий-влак, 15 – территориальный избирательный комиссий-влакын ончычсо составышт, 10 – муниципал образований-влакын представительный органышт, 73 – паша да илыме вер шот дене сайлыше-влакын погынымашышт темленыт.
17 территориальный комиссийын у составышкышт чыла ныл парламентский партийын еҥышт пурталтыныт. «Яблоко» политический партийын темлыме еҥже гын ынде — Йошкар-Оласе 1-ше №-ан территориальный избирательной комиссийын членже.
Ийгот шот дене ТИК-влакын составышкышт пурышо-шамыч коклаште 8 еҥже 30 ий деч самырык, 126 — 30 гыч 50 ияш марте ийготан, 25 — 50 ий деч кугурак ийготан. Тыгодым нунын коклаште шукыракше ӱдырамаш – 112 еҥ да 47 пӧръеҥ.
ТИК-ым чумырымо годым Марий Эл ЦИК член-влак профессионализмлан, келшыше образований улмылан да избирательный комиссий-влакым «самырыкештарымылан» ойыреныт. Тыге угыч палемдыме ТИК член-влак коклаште 129 еҥ кӱшыл образованиян, нунын кокла гыч 33 – юридический образованиян.
Территориальный избирательный комиссий-влакын у составышт 2025 ий декабрь марте пашам ышташ тӱҥалыт. Икымше организационный заседанийышт 25 декабрьыште лийшаш. Туштак ТИК председатель-влакын алмаштышыштым да секретарь-влакым палемдат.
Марий Эл Рӱдӧ сайлымаш комиссийын председательже Ирина Татаринова ТИК-влакын у членыштым да председательыштым саламлен да нунылан сайын пашам ышташ тыланен.
Л.КАМАЛЕТДИНОВА
