10 октябрьыште Москваште, ВДНХ-ште, «Шӧртньӧ шыже» Российысе агропромышленный выставке 20-шо гана почылтын.
Тиде мероприятий – элнан тӱҥ ялозанлык форумжо. Тушто Российыште ыштен лукмо ялозанлык продукцийым, кочкышым аклаш, тыгак ялозанлык техникым ыштымаште, вольыкым ончымаште, кушкылым куштымаште, инноваций ден ресурсым аралыме технологийыште могай кӱкшытыш шумым пален налаш лиеш.
Ончерыште лийше вашлиймашлаште элнан тӱрлӧ субъектысе, СНГ-се, тора йотэлысе аграрий-влаклан икте-весе дене сай кылым ышташ, ужалыме ден коопераций кылым вияҥдаш йӧн уло.
Тиде кугу мероприятийышке Марий Элат шке лектышыжым ончыкташ наҥгаен. Кундемнан делегацийжым республик вуйлатыше А.Евстифеев вуйлата. Республикна шке стендшым молгунамсе семынак сайын ямдылен. Тушто Марий Элысе агропромышленный комплексыште могай лектышыш шумо да эн сай инвестиций проектла дене палдарат.
Экспозицийыште кундемнан ик эн виян да ончыл 20 предприятийже ончыкталтын. Выставкын унаже-влак Марий Элыште ыштен лукмо колбасам, консервым, сырым, чайым, сырам, мороженыйым, шӧр-торык, шыл, ложаш гыч ыштыме кочкышым тамлен кертыт.
– Ӱшанем, тенийсе выставке ӱмашсе семынак мыланна сай лектышан лиеш. Продукцийна чыланыштлан келша, тӱрлӧ договор-влак пеҥгыдемдалтыт манын шонем. Теве Марий Эл ден Башкортостан коклаште договореш кидпалым пыштыме. Тудын дене келшышын, каза шӧр продукцийым да сырым ыштыме производствым вияҥдена, – каласен А.Евстифеев.
РФ Федеральный Погынын Федераций Советшын Тӱнямбал паша шотышто комитетшын председательже К.Косачёв «Шӧртньӧ шыже» выставкыште ончыктымо экспозицийнам кӱкшын аклен да кундемыштына ыштен лукмо продукций экологий могырым яндар да сай качестван манын. А тӱнямбалне лач тидымак ончен аклат. Санденак Марий Элын потенциалже кугу. Тыгак К.Косачёв республик вуйлатыше дене ялозанлык продукцийым ыштен лукшо марий предприятий-влаклан полышым пуымо шотышто кутырен. Тидыже производитель-шамычлан шке продукцийым Российысе ден йот элысе рынкыш лукташ йӧным ышта, палемден сенатор.
Марий Эл вуйлатышын организаций да аналитике виктемжым уверже негызеш Л.ШАБДАРОВА ямдылен.
