15 сентябрьыште Э.Сапаев лӱмеш опер да балет академический театр у тургымжым да чапланыше балерине Галина Уланова лӱмеш XVIII фестивальым «Бахчисарайский фонтан» балет дене почын.
Ик кече ончыч республикын тӱвыра, савыктыш да калык паша шотышто министрже, спектакльын балетмейстер-постановщикше Константин Иванов тиде постановко да фестиваль нерген пресс-конференцийыште каласкален.
– Ойыртемалтше, чапле, ончаш толшо-влаклан икымше шинчаончалтыш гычак келшен шичше, виян спектакльым шындаш шоненам ыле, — палемдыш Констанин Анатольевич. — Шонымашем шукташ театрын тӱҥ художникше Владимир Королёв ден спектакльлан увертюрым возышо Григорий Архипов чот полшеныт.
Александр Пушкинын «Бахчисарайский фонтан» произведенийже кумда искусствышто моткоч кугу верым налеш. Тиде балетыште жапше годым Галина Улановат куштен, сандене тудым театр уэш репертуарышкыже пуртен.
– Спектакльым шукерте огыл Пермьыште, Нижний Новгородышто, Уфаште ончыктеныт, — ойлен К.Иванов. — Но ме драматический балет деч кораҥынна, ме пластике, куштымаш гоч сюжетым ончыктена.
Балетмейстер-постановщик шке шонымашкыже тӱрыс шуын. Чапле постановкым зал калык моткоч шокшын вашлийын. Моторын сӧрастарыме сцене, артист-влакын шийын-шӧртньын волгалтше костюмышт шинчалан перныде нигузе огыт код. А сценыште чын фонтаным ужаш — эшеат вучыдымо ыле! Тыште мыняр мастарлык, моштымаш кӱлыт! Спектакльыш театрын пӱтынь труппыжо ушнен, эсогыл Константин Иванов шкежат крым ханын, Гирейын, рольжым модын.
— Гирей – постановкын тӱҥ геройжо, романтик шӱлышан, йӧратыше. Кунам мый пытартыш сценыште ханын образшым возенам, тунамак тиде сценыште шкемын модмем шуын да нигӧлан пуэн омыл, — эше пресс-конференцийыштак воштылын ойлен ыле Российын сулло, Марий Элын калык артистше К.Иванов. — Тыгайже мый денем икымше гана лийын. Изиш эмганымемлан кӧра кушташ йӧсырак лиеш гынат, уло вийым пышташ логалеш.
Но Константин Анатольевич шке рольжым моткоч сайын модын. Эше кертеш! Чот кертеш! Залыште шокшо кидсовыш деч посна «Браво!» манме йӱкат ятыр гана шоктен.
Тиде балет дене театр коллектив чынже денак чот ӧрыктарен. Такшымат тушто кажне постановко виян, чапле, но тидыже эшеат чаплырак, чоным сымыстарыше! Тидым шке шинча денак ужман!
А фестиваль умбакыже шуйна. Тудо 19 сентябрьыште «Бахчисарайский фонтан» балет дене мучашлалтеш. А эрла тушто «Жизельым» ончыктат.
А.БАЙКОВА
Фотом театрын архивше гыч налме
