СЫЛНЫМУТ

«Тӱҥжӧ – калык поэтым йӧрата, акла»

25 апрельыште

Лӱмгече

«Тӱҥжӧ – калык поэтым  йӧрата, акла»

25 апрельыште Россий Писатель ушемын еҥже, поэт, ятыр ий шкенжым ялозанлыклан пӧлеклыше айдеме – Альберт Васильев — 60 ийым темыш. Тиде кечын сылнымут мастарым саламлаш Роҥго тӱвыра пӧртыштӧ йолташыже, пошкудыжо, сылнымутым йӧратыше, республикнан тӱрлӧ районлаж гыч толшо уна-влак ятырын погыненыт. 

Пайрем касым поэзий шӱлышан самырык мурызо Алёна Яковлева вӱдыш. Мурызо-влак Валерий Тихонов, Геннадий Григорьев, Полина Савельева, Александр Мамаев, Геннадий Куклин, Ольга Якимова  Альберт Васильевын мутшылан возымо икмыняр у муро дене куандарышт. Моткоч шокшын вашлийын Роҥго калык Советский посёлкышто илыше самодеятельный автор да мурызо Валерий Александровым. Калыкын йӧратыме «Йомдарыме пиал» мурыжым «Ямде лий» газет редакцийын ответственный секретарьже Анфиса Эманова пӧлеклыш. 

М.Шкетан лӱмеш театрын артистше Михаил Александров поэтын икмыняр почеламутшым лудо. Концертым тыгак Марий Элын сулло артисткыже, Олык Ипай лӱмеш кугыжаныш премийын лауреатше Эльвира Попова сӧрастарыш.

Морко кундемым чапландарыше айдемым саламлаш толшо Изи-Кугунур тӱвыра пӧрт пеленысе «Ӱшӱт сем» ансамбльын веселан мурен-куштымыжо еҥ-влакын кумылыштым савырен.

Альберт Александровичым тиде кечын ятырын саламленыт. Тӱвыра, печать да калык-влакын пашашт шотышто министр М.З.Васютин дечын саламлымашан кагазым Рого кундем ял шотан администрацийым вуйлатыше Майя Васильевна Эшполдина кучыктыш. Моткоч вучыдымо лие Кугыжаныш Думын депутатше С.Ю.Солнцева деч Таумут.  Морко район администрацийым вуйлатыше С.Х.Григорьевын тауштыман серышыжым книгагудо вуйлатыше М.Н.Семёнова конден, тудо книгагудо лӱм денат саламлен да «Морко мланде» газет редакцийын 2017 ийын кокымшо пелийжылан подпискым пӧлеклен. 

Лӱмлӧ поэт ынде 37 ий Советский районым чапландара гынат, верысе администраций гыч, тӱвыра отдел, газет редакций деч ик еҥат лийын огыл. Эсогыл Марий Писатель ушемат ӧрдыжеш кодын.

Альберт Александровичлан тидыже, мутат уке, тӱҥ огыл. Тӱҥжӧ – калык поэтым йӧрата, акла, а тидыжым тудын зал тич шыҥ-шыҥ  погынымыжо  пеҥгыдемдыш.

Н. Эмыкан.

 

Опубликовать в Одноклассники