Шукерте огыл куштылго атлетикым йӧратыше-влак моткоч кужу, 500 километран, суперэстафетым эртеныт. Ты куржталмашын амалже: эстафетыште тӱшкан рекордым шындаш. Тудым Йошкар-Оласе «Здоровая жизнь» компаний («Сестрица» вӱдым луктеш) организоватлен. Старт 2 августышто пуалтын.
Тушко чылаже икмыняр кундем гыч 18 ийым темыше деч кугурак 120 еҥ ушнен. Нунын коклаште тыглай куржталаш йєратыше, профессионал-спортсменжат лийыныт. Маршрутшо: «Нижний Новгород – Чебоксар – Йошкар-Ола – Казань».
Участник-влак палемдыме эстафетым 39 шагатат 45 минутышто эртеныт.
Стартым 2 августышто Нижний Новгородышто 19 шагатлан пуалтын гын, финиш 4 августышто Озаҥ олаште 10 шагатат 45 минутышто лийын.
Тидымат палемдаш уто огыл: 3 августышто, 22 шагат эрталтымеке, Татарстан ден Марий Эл гыч спортсмен-влакым Йошкар-Оласе Патриарший площадьыште бенгальский тулым чӱктен вашлийыныт.
Суперэстафете деч вара команде-влакын капитанышт тӱрлӧ этапыште эн писе, эн чытыше-шамычым палемденыт.
Эн весела да шуко участникан команде семын пошкудо Чувашийын сборныйжо ойыртемалтын.
– Тыгайже икымше гана лийын. Ты эстафетыште куржаш темлымекышт, мый уло кумылын ушненам, – ойла эстафетын участникше, Советский район гыч (кызыт Йошкар-Олаште ила) Инна Иванова. – Мемнан команде гыч эн писе да сай результатым Звенигово район гыч Леонид Суворов ончыктен. Мыланем вич этапым куржаш логалын. Тыге чылаже иктаж кумло меҥгышке погынен. Куржаш куштылго ыле. Игечат йўран огыл. Южыштлан курыкан вер логалын, вот нунылан изиш нелырак лийын, докан. Тыгай забеглашке мый ушнашак тыршем. Илышыш ала-могай, вучыдымо ойыртемым пурташак кӱлеш. Латкок ий наре куржталаш йӧратыше-влакын «Айвика» клубышкышт коштам. Икте-весе дене вашлияш, кутыралташ – моткоч оҥай йӧн. Пытартыш жапыште марафон, пелемарафонышто вием тергем.
Е.Эшкинина.
