Пенсий фондын специалистше улына, эмлан, квартплатылан ыштыме роскотын ужашыжым «закон почеш» пӧртылтен кертына, вашке черетан окса реформо лиеш манын, Йошкар-Олаште адакат пӧрт еда ондалкален кошташ тӱҥалыныт. Тидымак шотыш налын, Россий Пенсий фондын Марий Элысе пӧлкаже регионысо калык деч тӱткырак лияш йодеш да увертара: фондын специалистше-шамыч пӧрт еда огыт кошт, кудывечыште ма подъездыште вашлиймашым огыт эртаре, умылтарымаш пашам огыт виктаре. Нуно начарын тарванылше але коштын кертдыме граждан-влак деке мӧҥгышкышт ӱжмӧ почеш гына мият, тунамжак вашлийме кече ден жап шотышто ончылгоч кутырен келшат.
Пенсий фонд калык дене олаласе да районласе виктемлаштыже пашам ышта. Тудо клиент службо спискыжым официальный сайтышкыже (pfrf.ru) вераҥден. Россий Пенсий фондын Марий Элысе пӧлкажым, тыгак верысе органлам вуйлатыше-влакын ял шотан илем администрацийлашке але тудын тӱвыра пӧртлашкыже калык дене вашлияш мийымышт шотышто верысе кучем дене ончылгоч кутырен келшат да тидын нерген тӱшка увер средства, тыгак Пенсий фондын официальный сайтше полшымо дене увертарат.
Палыдыме еҥ дене вашлийын мутланыме годым, тудыжо мыняр кумылзак ынже лий, чыла ийготан граждан-влак деч тӱткырак лияш йодына:
- Пенсий фондын, вес кугыжаныш органын але олмыктымо организацийын пашаеҥже улам манеш гынат, палыдыме, йот еҥым пӧртыш, пачерыш тергыде ида пурто;
- палыдыме еҥлан документдам ида ончыкто;
- сайын ончалде, нимогай кагазыш киддам ида пыште;
- оксадам низаштат ида пу;
- Пенсий фонд дене кылдалтше чыла йодыш шотышто республикысе «шокшо линийын» 8-800-100-1680 номеран телефонышкыжо йыҥгыртыза.
М.ИВАНОВА
