Март мучаште Ханты-Мансийскыште Тӱп калык йылме идалыклан пӧлеклалтше тӱнямбал форум эртен. Тушко 500 наре еҥ погынен. Марий Элын официальный делегацийжым Марий Эл Правительстве председательын икымше алмаштышыже Михаил Васютин вуйлатен.

Форумыш Юграсе «Марий ушем» региональный мер организаций шке делегацийжым намиен. Тушто Сургут, Советский, Нефтеюганск олала, Сингпай, Федоровский поселкыла гыч марий-влак лийыныт. Нуно шке эксозицийыштым марий куштымаш дене почыныт. Ойыртемалтше вургемым чийыше, марла мурышо да куштышо землякна-влак тидын денак шинчаш перненыт. Эшежым шке стендыштым нуно национальный арвер, вургем, акрет экспонатла  дене пойдареныт.

 Каласен кодыман,  Юграсе «Марий ушем» Марий Элын Тӱвыра, печать да калык-влакын пашашт шотышто министерствыж дене кылым куча да чак пашам ышта. Февраль тӱҥалтыше ты ушем региональный организаций семын регистрацийым эртен. Тудын шым пӧлкаже уло. Таклан огыл Михаил Васютин форум жапыште Юграсе «Марий ушемын» чолга еҥже-влаклан министерствын тауштымашыжымат кучыктен.

 А такшым  Юграште 124 тӱрло калык ила. Марий-влакат  шукын улыт. Йот кундемыштат шке йылмыштым, йӱлаштым, тӱвыраштым арален кодымо верч чот тыршат.

С.Носова.