Марий Элын социальный аралымаш системыжын стационар тӧнежлаштыже илыше-влак ынде, манмыла, вожылде шыргыжыт.
«Шоҥгылык куандара» («Старость в радость») поро кумыл фонд социальный обслуживанийын стационар организацийлаштыже социальный услугым налше-влаклан пӱйым протезироватлыме да катарактым эмлыме шотышто медицине услугым налашлан 216510 теҥгем ойырен.
Тидын дене келшышын, социальный обслуживанийын 16 организацийыштыже 100 еҥын умша кӧргыжым тергыме да кӧлан коронкым, кӧлан протезым але «пашмам» шындаш кӱлмым рашемдыме. 2020 ий мучаш марте шым еҥын пӱйжым эмлен пытарыме, луыным эмлаш гына тӱҥалме. Тений социальный услугым налше эше 83 еҥын пӱйжым протезироватлаш палемдыме.
Тылеч посна катарактым эмлашлан 9 организацийыште илыше 55 еҥын шинчажым тергыме, тыгодым 12 еҥлан операцийым ышташ кӱлмым рашемдыме. 2020 ий мучаш марте социальный услугым налше 6 еҥым эмлыме, тидлан 193200 теҥгем кучылтмо. Тений катаракте деч эше 6 еҥым эмлат.
Марий Элын Социальный вияҥмаш министерствыже «Шоҥгылык куандара» поро кумыл фондлан социальный тӧнежлаште илыше-влаклан пиалан шыргыжмаш ден ончалтышым пӧлеклымыжлан таушта.
М.ИВАНОВА
