УВЕР ЙОГЫН

Тӱнямбал гроссмейстер – Йошкар-Олаште

Марий Эл вуйлатыше Александр Евстифеев ден шахмат дене тӱнямбал чемпион, гроссмейстер, ФИДЕ тӱнямбал кубокым сеҥен налше, Россий спортын мастерже Сергей Карякин Йошкар-Олаште шахмат дене Россий кубокын этапшын нылымше турниржым почыныт. Тудо «Марий мландыште» маналтеш.

Регион вуйлатыше, турнирыш погынышо-влакым саламлен да палемден: Марий Эл Правительствын спортым вияҥдыме да тудлан шукырак еҥым шӱмаҥдыме ик эн тӱҥ задачыжлан шотлалтеш. Тидыже палынак шижалтеш: кок ий жапыште шахмат клубыш да секцийыш коштшо-влак 25 процентлан шуко маныт. 

Йошкар-Олаште идалык наре ончыч гына почылтшо Сергей Карякинын школыштыжо Россий кубокын черетан этапше эртымым Александр Евстифеев сайлан шотла, вет тудым тӱнямбал гроссмейстер шкежак почаш толын. А тидыже кушкын толшо тукымлан шкештым ончыкташ сай йӧным пуа.

— Россий президент Владимир Путин спортын чыла видшым сайлан шотла, но шахмат дене модмо шотышто ик гана веле огыл посна палемден. Шахмат уш-акылым тергыше, вияҥдыше модыш, а эн тӱҥжӧ тудо кӧргӧ вийым тергаш тарата, уш-акылым пойдараш полша, — палемден Марий Эл вуйлатыше.

Шахмат дене тӱнямбал чемпион Сергей Карякин тудын лӱмжым нумалше школыш коштшо-влакын сай результатым ончыктымыштым да школын вияҥмыжым шижын шуктен. Тушто кызыт шӱдӧ наре еҥ уло. Икшыве-влак вияҥыт, таҥасымашлаштат сеҥымашке шуыт.

— Тек школна ончыкыжымат вияҥеш да талантан эрге-ӱдыр-влак кугу кӱкшытыш шумышт дене куандарат. Изинекак шахматлан шӱмаҥше веле тӱнямбал чемпион марте кушкаш лиеш, — палемден Сергей Карякин да ФИДЕ дене тӱнямбал первенствын бронзо призёржо, 11 ияш рвезе-влак коклаште 2018 ийысе Российын чемпионжо, спорт мастерыш кандидат, Медведевысе спорт школын тунемшыже Максим Волков дене вич минуташ блиц-турнирым эртарен. Марий Элын самырык шахматистше модмаште шкенжым сайын ончыктен.

— Йоча-влак тыглай гына модын чемпион лийын огыт керт. Нунылан тӱрлӧ таҥасымашке ушныман, модмо кӱкшытым нӧлтыман, йоҥылышым тӧрлаш тыршыман. А тидын шотышто тренер дене каҥашыман. Сандене тыгай таҥасымаш-влак кӱлешан улыт да нуным Россий мучко, поснак регионлаште эртарыман, — ойлен С.Карякин.

Россий кубокын этапышкыже Российын 11 субъектше: Киров, Самара,  Нижегородский областьла, Пермь кундем, Марий Эл, Татарстан, Коми, Чуваш, Тыва республикла, Хант-Манси, Ямал-Ненец автономный округла — гыч 9-15 ияш 89 шахматист ушнен.

— Таҥасымаште чылан пеш тале улыт, сандене сеҥышыш шуаш  куштылгыжак огыл, но мый тыршем. Шахмат дене модаш ончыкыжым жапым шукырак ойыраш да сеҥалтме партийыште ыштыме йоҥылышем-влакым шекланаш тӱҥалам, — республик вуйлатышылан да тӱнямбал гроссмейстерлан чоным почын каласен Йошкар-Ола гыч спортсменке Даша Шипицына.

Таҥасымаш кугу кӱкшытыштӧ эрта. Турнирын тӱҥ судьяже  — чапланыше тӱнямбал арбитр, всероссийский категориян спорт судья Владимир Староторжский.

— Тыгай кӱкшытан таҥасымашын йодмашыж почеш, залыште волгыдо ситышаш, пӱкен, ӱстембал-влак чын вераҥдалтшаш улыт да молат. Сандене ме залым, воктенысе пӧлемлам чыла шотыштат терген лектынна – чылажат йодмашлан келшен толеш. Тиде таҥасымашлан моткоч сайын ямдылалтме шижалтеш. Ӱдыр-рвезе-влак молодец улыт. Южышт тыгай таҥасымаште икымше гана улыт, — палемден В.Староторжский.

Россий кубокын этапше 4 август марте эрта. Таҥасымаш шахмат спортым вияҥдаш да самырык шахматист-влакын мастарлыкыштым пеҥгыдемдаш полша.

 

Марий Эл Республикым вуйлатышын организаций-аналитике виктемжын уверже негызеш А.БАЙКОВА ямдылен.

Опубликовать в Одноклассники

Добавить комментарий