29 апрельыште Марий Элым вуйлатыше Юрий Зайцев ден правительствын еҥже-влак Россий президент Владимир Путинын тӱҥалтышыж дене регионлаште организоватлыме «Шарнымаш сад» тӱнямбал акцийыште да «Сеҥымаш чодыра» проектыште участвоватленыт.
– Кугу Отечественный сарыште вуйым пыштыше 27 миллион еҥым шарныме лӱмеш 27 миллион пушеҥгым шындышаш улына. «Шарнымаш сад» акций тӱҥалме жап гыч республикыштына илыше шым тӱжем утла еҥ 800 тӱжем наре кушкылым шынден – тӱшка пашаште Марий Элынат надырже уло. Мероприятийын кӱлешлыкше моткоч кугу, молан манаш гын кызыт Россий, шуко ий ончычсо семынак, фашизм ваштареш кредалеш, – палемден Ю.Зайцев.
Акций патриотизм шӱлышым вияҥдыме велым веле огыл, чодырам пожар деч вара шотыш кондымо денат кӱлешан, ешарен регионым вуйлатыше.
Республикыштына «Шарнымаш сад» акций нылымше гана эртен. 20 гыч 30 апрель марте чыла районысо чодыраште чылаже 352 тӱжем пушеҥге озымым шындыме.
Тиде кечынак «Сеҥымаш чодыра» акций тӱҥалын. Тений тушко «Единый Россий» партийын, «Молодёжка ОНФ» мер толкынын, УФСИН-ын еҥже, Торгово-технологиечский колледжын, МарГУ-н, ПГТУ-н студентше, «Делай!» всероссийский экологический организацийын волонтёржо-влак да республикысе калык ушненыт. Акцийын кышкарыштыже 9,4 гектар кумдыкыш 31 тӱжем пӱнчӧ озымым шындаш палемдыме.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
