Марий Элын Тазалыкым аралыме министерствыжын увертарымыж почеш, Туберкулёз ваштареш кучедалме республиканский диспансерын терапевтический отделенийыштыже тӱҥ медсестралан пашам ыштыше Полина Волкова (снимкыште) теният тӱнямбал фтизиатрический службын эн уста специалистше-влак радамыш логалын.
Саратов оласе медицине училищым отличий дене тунем лекмекыже, П.Волкова тиде областьысе ик эмлымверыште кандаш ий медсестралан тыршен, а вара ешыж дене Йошкар-Олашке илаш куснен. Тыште тудо Туберкулёз ваштареш кучедалме республиканский диспансерын терапевтический отделенийышкыже медсестралан пашам ышташ пурен, пеш вашке кугурак медсестран дублёржо лийын, а 2002 ийыште – тӱҥ медсестра.
Полина Петровна мер пашамат кумылын шуктен: Республикысе кокла медицине пашаеҥ-влакын ассоциацийыштын чолга еҥже лийын, фтизиатрий секцийым вуйлатен, туберкулёз ваштареш кучедалме шотышто тӱнямбал проектым илышыш пуртымо пашаште участвоватлен да, тудым иктешлыме почеш, 2007 ийыште тӱнямбал фтизиатрический профильын эн сай медсестраже семын палемдалтын.
2011 ийыште П.Волковалан Кокла медицине пашаеҥ-влакын ассоциацийышт деч Кугыжаныш Думын депутатышкыже кандидат-шамычын праймеризыштышт участвоватлаш ӱшаненыт. Калык ончылно выступатлыме тиде икымше опытшо «Общероссийский калык фронт» толкынын регионысо штабшын сопредседательжылан, вара В.В.Путинын ӱшаныме еҥжылан палемдыме годым моткоч кӱлеш лийын.
Мер паша профессиональный пашаште сеҥымашке шуаш чаракым ыштен огыл: Полина Петровна тугак семинарлаште участвоватлен, тудын пациент-влаклан ямдылыме туберкулёз дене икымше гана черланыше еҥ-влакым эмлаш лийме нерген методикыжым эн сайлан шотлымо.
М.ИВАНОВА
