ПАТЫРЛЫК

Ты тукымланат сарым эрташ пӱралтын

Герой-влакым шарналтен

Ты тукымланат сарым эрташ пӱралтын

Июльын икымше кечынже Марий Турек поселкын рӱдӧ паркыштыже Афганистан ден Чечня сарын участникше-влак шкеныштын ойганен шарныме кечылан пӧлеклалтше митингым эртареныт. Сар ден «шокшо точкылаште» вуйым пыштыше-влак лӱмеш шогалтыме шарнымаш кӱ ончыко, йӱран кечым ончыде, ятыр ветеран толын. Район гыч шым самырык рвезе, военный приказым шуктышыла, шке илышыштым пуэныт. Нунын лӱмышт курымашлык чаҥ йӱкла йоҥгалтыныт, ик минут шып шоген шарналтеныт, пеледышым пыштеныт.

Мероприятийым организоватлыше да эртарыше, Чечня сарын ветеранже В.Зайцевын мутшо почеш, погынышо-влакым Марий Турек район администраций вуйлатыше С.Решетов, сарын, пашан, Вооруженный Вийын да правам аралыше орган-влакын районысо советыштын председательже Р.Шигапов саламленыт. Торжественный ужашлан ветеран-влакын «Боевое братство» Всероссийский мер организацийыштын Марий Элысе отделенийжын председательже В.Белоусовын Марий Турекысе тыгаяк лӱман отделенийлан «Боевое братство» Всероссийский мер организацийын знамяжым кучыктымым шотлыман. Воинский йӱла почеш тудым локальный сарын участникше орденан ветеран-влак Г.Гайсин ден Е.Зубарев налыныт. Марий Эл военкомын полышкалышыже А.Курочкин самырык тукымым элым йӧратыме шӱлышеш шуарымаште да самырык еҥ-влакым Вооруженный Вий радамыште службым эрташ ямдылымаште чулымын тыршыше-шамычлан почетан грамотым кучыктен.

Ты мероприятийыште «Боевое братство» Всероссийский мер организацийын Марий Турекысе  отделенийжын председательжылан Чечня сарын участникше В.Зайцевым ойыреныт.

Митингым эртарымаште Марий Турек кыдалаш школын тунемшыже-влак кугу полышым пуэныт. Чот йӱршӧ йӱрым ончыде, нуно зонтик йымалне почетан караулышто шогеныт, почеламутым лудыныт, ветеран-влак дене пырля фотографироватлалтыныт. Начар игече нуным лӱдыктен огыл.  «Шолем йогаш тӱҥалеш гынат, ме мӧҥгӧ огына кай. Вет нине ветеран-влак сарым эртеныт, пуля ваштареш геройла шогеныт, а ме ик шагатымат шоген огына турко мо?» — чылашт олмеш манын ик ӱдыр. Тидым чон вошт колтен каласыме патриотизм манаш лиеш!

Палемдыман: 1 июль Российыште шарнымашан кече – Боевой действийын ветеранже-влакын кечышт. Кызытеш тудын официальный статусшо уке гынат, элыштына кажне ийын утларак палыме лиеш. 2009 ий гыч ты пайрем  тыгак «Боевой действийын ветеранже-влакым ойганен шарныме кече» лӱмым налын. Тиде — Россий верч кредалше-влакым шарныме кече. Тыште Родиным аралымаште шке порысым шуктышыла могай сарыште да военный конфликтлаште лийме тӱҥ огыл. Тиде – сареш вуйым пыштыше да тушеч пӧртылын илыш гыч кайыше, кызыт илыше-шамычым пагален шарныме кече. Лач ты кечылан 1 июльым ойырен налме.

А.АНДРЕЕВ ямдылен.

Снимкылаште : митинглан йӱр чаракым ыштен огыл.

В.Зайцевын фотожо.

Опубликовать в Одноклассники

Добавить комментарий