Юрино посёлкысо Шереметьев замкыште православный самырык-влаклан Сретенский бал эртен.
Тушко Марьино, Васильевский, Горно-Шумецкий, Козиково, Юрино школла гыч кугурак класслаште тунемше 46 ӱдыр-рвезе миен. Баллан нуно тылзе ончычак ямдылалташ тӱҥалыныт улмаш, куштымаш-влакым тунемыныт. А пайрем сценарийым Архангел Михаилын храмжын да районысо администрацийын пашаеҥже-влак иквереш ямдыленыт. Юринысе предприниматель-влак фуршетлан шийвундым ойыреныт.
Балым эртараш замкын пашаеҥже-влакат ямдылалтыныт. Пайрем кечын мотор бальный тувырым чийыше ӱдыр-влак костюмым чийыше рвезе-влак дене пырля замкын тошкалтышыж дене «телымсе садыш» кӱзеныт. Полонезын семже йоҥген. Чылажат пеш мотор лийын… Балын участникше-влакым район администрацийым вуйлатышын алмаштышыже Ирина Куклева, Архангел Михаилын храмжын настоятельже протоиерей Николай Барсуков саламленыт. Ты храмын черке хоржо духовный муро-влакым йоҥгалтарен. А вара мужыр-влак 19-ше курымысо сем почеш куштеныт. Концерт программе эртымеке, Юрино школын «Сударушка» ансамбльже руш куштымаш дене мастер-классым эртарен. Мучашлан чылан вальсым куштеныт. Касым иктешлыме семын балын король ден королевыжым ойыреныт. Тиде кок титул Юрино школын тунемшыже-влак Илья Абрамов ден Елена Немцевалан логалын.
С.Носова.