Россий мучко тиде организаций радамышке кок шӱдӧ нылле тӱжем ӱдыр-рвезе-влак ушненыт. Марий Эл гычат шагалын огыл улыт. Мом нуно ыштат, отрядын боецше могай лийшаш – айста шкешт деч пален налына.
Татьяна Мамаева, «Регион 12» проводник отрядын командирже:
– «Регион 12» отрядын проводникше-влак Санкт-Петербург ден Новороссийск олаласе кӱртньыгорно вокзалыште пашам тӱҥалыт. Юл да йӱдвел могырыш кудалше россий поездлаште тыршат.
Проводник лияш куштылго огыл. Мемнан деке ушнышо боец пашам йӧратышаш. Вет ме кажне кечын шагал огыл еҥ дене вашлиялтына. Нунын кудалме корнышт ласкан, эҥгек деч посна эртыже манын тыршена. Тыгай сомыллан ямде улыда гын – ушныза.
Студент отряд-влак нерген 2017 ийыште пален налынам. Поездыште ыштыме тӱрлӧ кундемым ужаш йӧным пуа. Садлан проводниклан тунемаш кас курсыш коштынам. 2018 ийыште кеҥежым мемнан отрядым Санкт-Петербургыш наҥгаеныт. Тунам командир лиям манын шоналташат тоштын омыл.
Елизавата Иванова, «Пламенный свет» сервис отрядын комиссарже:
– Мыланна пашаверым Крымысе унагудо рӱдер-влак пуат.
«Пламенный свет» отряд шукерте огыл «шочын». 17 февраль деч вара мемнан деке ушнаш йодмашым колташ лиеш. Кеҥеж марте тренинг ден вашлиймаш-влакым эртараш тӱҥалына.
Ирина Шевнина, «Авиценна» медицине отрядын командирже:
– Медицине персонал семын йоча лагерьлаште да медицине организацийлаште полышым пуэна. Татарстан Республик, Краснодар кундем, Новосибирск ола да эше шуко моло регионлаш кудалыштына.
Мемнан деке кӱлеш образованийым налше еҥ веле логал кертеш.
Анастасия Князева, «Ералаш» педагогический отрядын командирже:
– Мемнан отрядысе боец-влак республикысе веле огыл, тыгак кумдан палыме «Артек», «Орлёнок», «Смена», «Океан», Москосо «Оргресс» лагерьлаште тыршат. Йоча-влак дене пашам ышташ тӱҥалме деч ончыч нуно чылан тунемме курсым эртеныт. Вожатый лияш кумылда уло гын, кызытак палдарыза.
Кум ий ончыч «Ералаш» отрядыш командир кӱлеш манын ойленыт ыле. Мый келшенам. Кызытат уло кумылын лагерьлаш коштам да моло ӱдыр-рвезе-влаклан ты пашаш ушнаш полшем.
Лилия Закизанова, регионысо штаб вуйлатышын алмаштышыже:
– Респубрикысе улшо 13 отрядыште 250 еҥ тырша. Самырык-влакым ме эре вучена. Тидлан Вконтакте соцкылыште «Студенческие отряды Марий Эл» тӱшкашке серышым возен колтыман але Самырык-влак полатыште верланыше студотрядын штабышкыже толман (1-ше пӧлем).
Студент отряд-влакын командир, комиссар, боец да ветеранже-влакым тиде пайрем дене шокшын саламлем!
О.МОШКИНА
