Л.И.Соколова лӱмеш Йошкар-Оласе йоча больницын онкогематологий отделенийыштыже тромбомиксер пудыргымылан да тудын олмеш весым налаш кӱлмылан кӧра «Кугыеҥ-влак – йоча-шамычлан» поро кумыл фонд бизнес-сообществе да калык деч окса полышым йодеш.
Тиде аппарат тромбоцитын концентратшым эн келшыше условийыште аралаш палемдалтын. Оборудованийын пудыргымыжлан кӧра кызыт медсестра-влак тромбоцитым икте-весе деке пижедылмышт деч корзиҥгалаште лугат. Чаманен палемдыман, пудыргышо аппаратым гарантий почеш олмыкташ огеш лий, а у оборудованийым бюджет окса кӱшеш налаш йӧн уке.
«Кугыеҥ-влак – йоча-шамычлан» поро кумыл фонд онкогематологий чер дене орланыше йоча-шамычлан ынде 10 утла ий тӱрлӧ семын полша, сандене тиде случайыштат ӧрдыжеш кодын огыл.
М.ИВАНОВА
