Козьмодемьянск оласе икмыняр школышто да администрацийыште, тошто батарейкым погаш манын, лӱмын контейнер-влакым вераҥденыт улмаш. Тыгай экологий проектым эртараш школын тунемшыже Сергей Тямушкин темлен. Сай пашам аклен, тудым илышыш шыҥдарымашке оласе администрацийын йырым-йырысе средам аралыме шотышто пӧлкаже, волонтер, школ кучемын ончылъеҥже-влак ушненыт. Тӱшка вий дене 1800 наре батарейкым погеныт да Чебоксарыш утилизацийыш наҥгаеныт.
Тошто батарейке рокыш але вӱдыш логалеш гын, чынжымак, кугу эҥгекым конден кертеш, палемдат специалист-влак. Батарейкыште неле кӱртньын видше-влак — ртуть, марганец, кадмий, никель, свинец, литий, цинк — улыт. Мутлан, свалкыште йӱлатыме годым нуно йырым-йырысе средаш аяр веществам луктыт, южым амыртат да айдемын тазалыкшылан кугу эҥгекым кондат. Тыгай кӱртньӧ варажым мландыш, кушкылыш але вӱдыш волен шинчеш гын, чыла аяржат тушан кодеш. Тыгак аяр варажым айдемын, вольыкын кочкышышкыжо пӧртыл кертеш. Специалист-влакын ойлымышт почеш, ик изи батарейке 20 квадрат метр кумдыкым локтыл кертеш.
Йошкар-Олаште тудым чумырышо организаций уке огыл. «Самырык-влакын экологий ушемышт», «Розовый одуванчик» ты шотышто сайын пашам ыштат. Юл кундемысе технологический университетын фойештыже, тыгак кумшо корпусын фойештыже нуно экоконтейнер-влакым вераҥденыт.
Тошто батарейкым погымо акцийым посна еҥ, моло организаций-влакат эртарат. Кодшо шуматкечын тыгай экоконтейнерым эсогыл общественный мончаштат ужым. Тошто батарейкым погымо экоконтейнер Йошкар-Олаште икмыняр вере уло. Мутлан, Первомайский уремысе «Прорайдер» кевытыште, Йоча эколого-биологический рӱдерыште, Марий кугыжаныш университетын биолого-химический факультетшын корпусыштыжо, Йошкар-Оласе администрацийын фойештыже да посна пӧртлаштат.
Интернетыште вес уаверат уло: тошто батарейкым тошто аккумуляторым сдатлыме верышкат намияш лиеш. Тушто эсогыл ик килограммжылан 20 теҥгем тӱлат. А такшым, тошто батарейкым Российыште лач Челябинскысе заводышто гына утилизироватлат.
С.Носова.
