КУЛЬТУР ДА ИСКУССТВО МАРИЙ ТӰНЯ УВЕР ЙОГЫН

«Тидым ойлынем ыле…»

«Тидым ойлынем ыле…»
Кушкыжмын кечывал лишан (тиде 13 октябрь 2020 ийыште лийын) телефонышкем йыҥгыртыше еҥын лӱмжӧ  «Шапкин» манын лекте. «Алло» манын гына шуктышым, тушто рвезын йӱкшӧ шоктыш: «Ачай тендан дене мутланынеже…» да ик вич секунд гыч палыме йӱкым кольым: «Поро… Тиде Шапкин». Йӱкшӧ раш, но тунамак кумыл тодылтшын йоҥгыш. Молан йыҥгыртымыжым вигак умылтараш пиже.
— Теҥгече Абдулов йыҥгыртыш. Тудо мане: «Виталий Владимирович, ме «Марий Эл» газет коллектив лӱм дене Тыланда полышым пуынена…». Александр Саликовичын тыге йыҥгыртымыда дене мыйын кумыл тодылалте да ӱшан шочо – порылык эше ила.
А таче, Светлана, ручкам да кагазым нал, мом каласымем возо. Лишыл номереш савыктыза.
Пӱрымаш тыге савырныш, август мучаште илышемын пытартыш корнышкыжо вончышым. Пока илем, ушем уло, каласен кодынем. Ӱмырем мучко «Марий Эл», ончыч «Марий коммуна», дене кылым кучем. Музыкальный училищыште тунемме жап гычак, ынде 50 ий наре, марий газетна гоч кундемнан калыкнан илышыжым эскерем, шкемын возымемат шуко савыкталтын.
Тау шомакем таче лачак «Марий Эл» газетын журналистше-влаклан, кӧ тушто пашам ышта да ончыч ыштен. Нуно эреак мыйым «алгаштарен» шогеныт. Неле жапыштемат, поро жапыштемат марий газетна эреак полшен, пеленем лийын. Сандене мый кажне журналистлан таче саламым да кугу таум ойлем. Пашаштыда, илышыштыда сайым гына тыланен кодам. Тендам шоналтыме еда мыйым поро шарнымаш гына авалта.
Кызыт Светлана пелашем мыйым йӱдшӧ-кечыже  онча… Илышлан ӧпкем йӧршынат уке… Валентин Исинеков манмыла, «Тыгеракын ойла письмажат».
Виталий Владмирович, чынже денак, газетна дене пеҥгыде кылыште. Иктаж статья келшен але келшен огыл, йыҥгыртен, шке шонымашыжым шылтыде каласа. Кунамже «тидын нерген возем мо?» йодеш. Кӱчыкын ойлышо, но поро мутшым нигунамат чаманыдыме Шапкин шылталыме мутшымат раш каласа, кеч культур да искусство теме лийже, кеч калыкнан тачысе илышыже да ончыкылыкшо…
Пытартыш жапыште тудо Андрей Эшпай нерген эше ик книгам возен. «Мыйым министр Иванов тиде пашалан таратыш» мане эше шошым. А август тў‰алтыште йы‰гыртен каласыш: пытарышым, наборым ышташ, савыкташ гына кодын… 28 августышто, кугарнян, кандаш шагат кастене йыҥгыртымыж дене поро огыл уверым ойлыш: Музыкальный творчествем, возымо пашам мучашке лишеме. Эмлыверыш логальым. Шочмын книгамым лудаш тӱҥальымат, шижам, ик предложний деч вара вуй мыйым ок колышт… Мыйым умылыметлан, колышт моштыметлан кугу тау. Пашат умбакыжат ушныжо… Логарысе комылям нелаш точенак «Чыталтыза, эше тӧрланеда» манын, ӱшанен кутырымыжлан мыят тауштышым.
Кушкыжмын йыҥгыртымыж годым «Эше илем, ик пел ийжым… книга мӧҥгыштем, кунам луктыт — шке палат. А газет гоч журналистда-влаклан тауштымо мутем лишыл номерыштак савыктыза» мане да ешарыш: «Тидым ойлынем ыле…».
Илыза кужун, Виталий Владимирович! Те пеҥгыде айдеме улыда. Сеҥен лекташ Юмо Тыланда вий-куатым пуыжо!
Светлана Пехметова.

Снимкыште: Виталий Шапкин — шочмо Тумерсола ялыштыже пошкудыжо-влак дене. Гармонь дене Евгений Каменщиков, пошкудо ял марий.

Светлана Пехметован фотожо.

Опубликовать в Одноклассники

Добавить комментарий