ТАЗАЛЫК

Тений – кудымшо ужашыжым

Кодшо арнян регионысо медицине тӧнежлам, страховой медицине организацийлам вуйлатыше, тыгак ОМС фондын еҥже-влакын совещанийышт лийын.

РФ Президент Владимир Путинын темлымыж почеш ямдылыме да республикыштына регионым вуйлатыше Александр Евстифеевын эскерымыж почеш шукталтше «Здравоохранений» национальный проектым илышыш пуртымо кышкарыште кучылтмо средства шотышто докладым Тазалыкым аралыме министерствын здравоохраненийын экономикыже да планированийже пӧлкан начальникше Нелли Русинова ыштен.

2019-2024 ийлаште «Здравоохранений» национальный проектын регионысо шым проектшым илышыш пурташлан чылаже 12 млрд.теҥгем кучылташ палемдыме, тышечын 1839,3 млн. теҥгежым – тений.  Докладчик кушко, молан мыняр теҥгем кучылтмо дене радамын палдарен.

Йошкар-Оласе йоча больницыште 15-17 ияш подростко-влакым медицине велым обслуживатлыме нерген эмлымверын тӱҥ врачше Юлиана Зейтулаева каласкален. Тудо подростко-влакын тазалыкышт дене кылдалтше шуко нелылыкым палемден. Таче тиде тӱшкаш пурышо чумыр ӱдыр-рвезе кокла гыч 16 процентше веле чылт тазалан шотлалтеш. Тидыже ситыдымашын амалжым кычалаш таратыде огеш керт.

Республикысе наркологический диспансерын тӱҥ врачше Сергей Бочкарев химический вещества дене пеҥгыде кылым кучышо пациент-влакын реабилитацийышт да ресоциализацийышт нерген каласкален, тыгодым нине еҥлан паша терапий программым кучылташ тӱҥалмылан тӱткышым ойыраш йодын.

Совещанийыште тазалыкым аралыме алан дене кылдалтше моло йодышымат лончыленыт.

М.ИВАНОВА

Опубликовать в Одноклассники

Добавить комментарий