— Медведево районысо “Шойбулакский“ племзавод” акционер ушемын пырчан ден отызан кушкылым ӱдымӧ кумдыкшо кандаш тӱжем наре гектарыш шуэш, — ойла озанлыкын тӱҥ агрономжо Сергей Горохов. — Пасуна Медведево, Оршанке, Советский районлаште верланен. “Лемкен” немыч сеялкым 2007 ийыште налме, ӱдымӧ тыгай технике республикысе моло озанлыкыштат уло. Тений нурыш варарак лекна: Медведево районышто — 30 апрельыште, а Советский районышто — 4 майыште. Таче кечылан (18 майлан) 4282 гектарыш ӱдымӧ. Кажне районышто ачалыше бригаде уло. Пашаш куд шагат эрдене лектына да пычкемыш марте ӱдена. Шокшо кочкышым ондакысе семынак пасушко кондена.
Советский район, Монаҥмучаш ял воктене пурсам ӱдаш куатле техникым, “Джондир”ден “Кировец” трактор-влакым , луктыныт.
М.СКОБЕЛЕВ.-
Авторын фотожо.
Снимкылаште: Механизатор-влак А.Крашенинников, Ю.Моторов ден водитель Е. Смирнов.
