Кодшо кечылаште Йошкар-Ола мэрын пашажым жаплан шуктышо Е.Маслов паша визит дене «Город» муниципал предприятийыште лийын.
Ты предприятийын директоржо Е.Дождиков дене мутланен да телылан лумым эрыктыше техникым, корно ияҥме деч кышкыме кӱлеш материалым ямдылымым рашемден.
Республикыште ик эн тӱҥлан шотлалтше коммунал предприятий рӱдоласе урем ден корно ушнымо 330 км утла кумдыкым, паркым, скверым, площадьым да моло общественный участкым шотышто куча.
Ола кумдыкым шотышто кучаш предприятийын паркыштыже 77 единице спецтехнике шотлалтеш. Кызытеш 63 процент техникыжым телылан оборудоватлен шуктымо, олмыктымо паша умбакыже шуйна. Икмыняр техникым ола уремыште корно ден тротуарым олмыктымашке, асфальтым шарымашке ушымо, – палемден Е.Дождиков.
Кызыт ты предприятийыште 350 наре пашазе: водитель, тракторист, корным ыштыше, ӱштшӧ, ужар кушкылым шындыше, слесарь, токарь, асфальтобетонщик да инженерно-технический сомыл дене кылдалтше пашазе-влак да молат тыршат.
Р.ЧЕПАКОВА
