Марий Эл гыч Екатерина Смирнова ече дене Тюменьыште эртыше Российын чемпионатыштыже вийжым терга. 31 мартыште элнан сборныйжын тале спортсменже Татьяна Сорина дене коктын шєӧрньӧ медальым сеҥен налыныт.
Ӱдырамаш-влак коклаште чемпионатын нылымше кечынже спринтыште ӱшанлын Тюмень областьын икымше командыже ончыко лектын. Тиде землячкына Е.Смирнова ден Т.Сорина. Икымше этапым Екатерина куржын, а кокымшышто Татьяна иктымат ончыкыжо колтен огыл.
– Тактике почеш икымше йырым тӱшкаште ласкан але шке темп дене куржын эртыман ыле. А кокымшо ден кумшо йырыште ончыко лекташ кӱлын, – палемден финиш деч вара Е.Смирнова «Телеспорт» каналын эфирыштыже.
Екатерина тӧрлӧ кужытышто тӱрлӧ верым налеш. Тылеч ончыч, 30 мартыште, 10 километрыште эрыкан йӧн дене 9-ше верыш лектын. Икымше Татьяна Сорина лийын. Тылеч кок кече ончыч марий ӱдыр 15 километрыште скиатлонышто 5-ше лийын.
Екатериналан умбакыжат сай результатым, пиалан ечыгорным, пеҥгыде тазалыкым тыланена.
Е.ЭШКИНИНА
