12-15 июльышто «ВийАр» ушем Морко район Унчо кундемыште «Унчоfest» лагерь-семинарым эртара.
Мерприятийыш чумыргышо-влак кином, мультфильмым ышташ тунемыт. Семинар жапыште тӱрлӧ мастер-класс, фильмым войзышо опытан еҥ-влак дене вашлиймаш, каныме кас, молат лийыт.
Лагерь видео дене пашам ышташ тӱҥалше-влаклан сценарист, оператор, видеограф, мер пашаеҥ да кином йӧратыше-шамыч дене вашлияш, нунын дене мутым вашталташ, каҥашаш йӧным пуа. «Унчоfest»-ыште ямдылыме видеофильм ден мультфильмым жюри акла. Паша-влак тукым гыч тукымыш вончышо иктаж сомыллан (пидме, ургымо, пу гыч пӱчкедыме, кочкаш шолтымо, колым кучымо, молат ) пӧлеклалтшаш.
Семинарыш школышто тунемше, студент, кином йӧратыше моло еҥат ушнен кертыт. Проект Россий Президентын ойырымо грантше да Марий Эл Республикын социальный вияҥмаш министерствыже полшымо дене илышыш шыҥдаралтеш.
Йодмашым 20 май марте sotnur@mail.ru электрон почтыш колтыман. Ешартыш уверым vk.com/uncho_fest интернет лаштыкыште пален налаш лиеш. Лекше йодышым 89600957707 телефон номер дене (Елена Александровна Иванова) рашемдыман.
Л.ШАБДАРОВА.
