10 августышто Шернур район Чылдемыр ялысе клубышто «Уна улам тӱняште» ден «Самырык ме улына» книган презентацийышт лийын. Вашлиймашке «ВийАр» ушем председатель Алёна Иванова, поэт Татьяна Токтарова (Япаева), «Ямде лий» газетын корреспондентше Христина Александрова, самырык возышо Дмитрий Веденькин, толыныт. Нунын коклаште мыят лийынам.
Шернур кундемын ик мотор ялыштыже мемнам Чылдемыр илем администраций вуйлатыше Дмитрий Кужнуров ден верысе клуб вуйлатыше Лариса Антропова шокшын вашлийыныт да книга-влак лекме дене саламленыт.
«Самырык ме улына» сборник – «Кеҥеж сылнымутчо-2020» литератур семинарын лектышыже. Тушко кызыт возен шогышо икмыняр авторын усталык саскашт пурен. Мероприятийыш ушнышо-влак дене почеламутын «шочмыжо», очеркын возалтмыже нерген мутланенна. Книга гыч икмыняр почеламутшым лудын ончыктенна.
Вес книгаже Татьяна Токтарован. «Школышто тунеммем годымак возаш тӱҥалынам. Икымше гана пашам Мишкан районысо «Келшымаш» газетеш лектын. Тудын деч вара Яныш Ялкайн лӱмеш эртарыме конкурслан возенам да «Чолман» газетыште пашам ыштыше акаемлан ончыктенам. Тудыжо икмыняр йоҥылышым верештын да кузе возаш кӱлмӧ нерген умылтарен. Но мыйын кумыл волен да ик жаплан ты пашам йӧршын кудалтенам ыле. Эшежым почеламутан тетрадь-влакемат йӱлалтен шуэнам.
Ты корныш мӧҥгеш пӧртылаш Полина йолташ ӱдырем таратен: почеламутым возышо студент-влак дене вашлиймашыш ӱжын. Тыгайже ончыч лийын огыл. Тушто Васли Ольош, Полина Апкадирова, Лена Тимирьянова, Марианна да Павел Апкадировмыт да мый лийынна. Пырля усталык сасканам лончыленна. Нуно мылам шуко кӱлеш каҥаш-влакым пуэныт да умбакыжымат тыршаш темленыт. Вара пӱрымаш Зоя Дудина дене ваш ыштен. Ту жапыште тудо «Марий Эл» газет редакцийын пашаеҥже ыле. Икымше кугу савыктышем тушан лектын», – палемден Таня.
Чылдемыр кундем талантан еҥ-влаклан поян. Мутлан самырык ӱдыр Анна Прохорова шке возымо почеламутшым йоҥгалтарыш, мурыш. Ираида Милютина «Тул пеледышем» книгаж дене палдарыш да мыланна пӧлек шотеш кучыктыш.
Лудшо да возышо коклаште кыл пеҥгыдак лийже манын, тыгай вашлиймаш лийшашак. Презентацийыш толмыштлан Чылдемыр калыклан таум ыштена. Корнына ты кундемыш эше ик гана веле огыл конда манын ӱшанена.
О.МОШКИНА
Д.Веденькинын фотожо
