Футбол дене «Локобол-2018-РЖД» тӱнямбал турнирын республик кӱкшытан этапыштыже Йошкар-Оласе «СШОР» команде сеҥышыш лектын. Финал модмаште «СШОР» Медведевысе «Витязь» командым 3:0 счёт дене сеҥен.
Самырык-влакын политикышт, спорт да туризм министерствын пресс-службыжын палемдымыж почеш, турнирыш 16 команде чумырген. 2007-2009 ийлаште шочшо рвезе-влак Звенигово, Йошкар-Ола, Козьмодемьянск, Волжск олала, Килемар, Советский, Шернур, Красногорский, Медведево посёлкыла, Параньга, Юрино, Оршанке районла, Азаново да Виловатово селала гыч лийыныт.
Турнирын эн сай модшыжо семын Тимофей Крыловым («СШОР»), Артемий Мальцевым («Витязь»), Глеб Ефремовым («СШОР-2007»), Владимир Ивановым («Семол») палемденыт.
«СШОР» команде Марий Элын чапшым Россий кӱкшытан таҥасымаште аралаш тӱҥалеш.
Е.Эшкинина.
