САМЫРЫК ТУКЫМ

Вӱдышӧ — йот эл гыч

 Вӱдышӧ кеч-могай мероприятийлан тӱҥалтышым пышта, «шӱлышым» пуа. Тидланже талант кӱлеш. Тидденак пырля кугу чытыш, лӱддымылык, йоҥгыдо йӱк лийшаш. Чыла тиде койыш тачысе лаштыкын унажын Жавохир Адхамжоновын уло.

— Палем, тый Узбекистан гыч улат. Марий Элышкыже кузе логалынат?

Школ жапыште тӱрлӧ профессийын сайже, удаже нерген шуко шонкаленам. Ача-ава денат тидын нерген мутланенам. Нуныжо врач лияш темленыт. Тыге, 11-ше класс деч вара, ончыкылык илышем медицине дене кылдаш манын, 8-10 вузлаш йодмашым колтенам. Нунын коклаште Марий кугыжаныш университетат лийын. Чыла вережат тунемаш налыныт. Аттестатым Иркутск олаш колтенам ыле. 1 сентябрь деч икмыняр кече ончыч документем Иркутск гыч налын, Йошкар-Олаш чоҥештен толынам. Тыге Марий Элыште 5-ше ий илем.

— Мӧҥгӧ нерген шонет?

Мый Намаган ола гыч улам. Тунемме жапыште шочмо суртышто кок гана веле лийынам. Пытартыш гана ача-авам, шольым ужмемлан тений кеҥежым кок ий лиеш. Мутат уке, лишыл еҥ-влак деч посна йокрокланем.

— Олаште, университетыште эртаралтше мероприятийлаште вӱдышӧ семын чӱчкыдын коят.

Тиде аланыш 2018 ийыште «Лесная сказка» санаторийыште лийме деч вара ушненам. Тушто ончыкылык студент-куратор-влаклан тренингым эртареныт ыле. Нуно икымше курс ӱдыр-рвезе-влаклан тӱрлӧ лекше йодышым рашемдаш полшат. Тунам тунемме кокла гыч, кок тӱшкалан шелалтын, проектым шонаш логалын. Возымо пашанам аралаш мыланем ӱшаненыт. Микрофоным кидыш налмеке, тургыжланаш тӱҥалынам: йол чытыра, йӱк йомеш, экраныште мом возымым моторын лудынат ом керт. Пеш шучкын чучын. Тренинг жапыштак вӱдышӧ-влакын  школышт нерген пален налынам. Кум тылзе сценыште шкем чын вӱдаш, еҥ ончылно чолган кучаш тушто тунемынам. Тиддеч вара вӱдышӧ семын икымше гана «Кокшаге ӱмбалне шонанпыл» фестивальыште лектынам.

        — Сценыште шкем кузе ӱшанлын кучаш кӱлмӧ нерген палдаре.

         Кажне еҥын шке йӧнжӧ. Кӧлан гын иктаж-мыняр выступлений деч вара веле куштылго лиеш. Южыжо тӱрлӧ упражнений дене пайдалана.
Мутлан, кугун шӱлымӧ, тӧрштылмӧ, куштымо полшен кертыт. Шып шогаш але медитацийым эртараш лиеш. Тыгак чурий чогашылым лывырташ кӱлеш.

       — Йот кундем гыч толынат манмылан ӱшанымыла огеш чуч. Рушла сайын кутырет…

      — Йоча садыштак руш тӱшкаш коштынам. Школыштат руш коклаштак тунемынам. Марий-влак коклаште илен, марлат изиш умылем. «Марий улам», «мом ыштет?», «колат?», «шич», «воч», «изи пычырикем», «веҥе» мут-влакым палем.

Пашат ушныжо!

Тау!

О.МОШКИНА

Опубликовать в Одноклассники

Добавить комментарий