КУЛЬТУР ДА ИСКУССТВО САМЫРЫК ТУКЫМ

Кажне паша кече куаным конда

25 март – тӱвыра аланыште тыршыше-влакын пайремышт. Тиде кече вашеш Звенигово район Марий Отар ялысе клуб вуйлатыше  Анастасия Алексеева дене вашлийын мутланышна.

Весела, лыжга, поро кумылан ӱдырамаш Волжский район Купсола селаште шочын. Звенигово район Марий Отар ялыш марлан толын, кум эрге икшывым кушта. Жапыштыже штукатур-малярлан тунем лектын, кызыт И.С.Палантай лӱмеш тӱвыра да сымыктыш колледжыште шинчымашым нӧлта.

Анастасия, ты аланыш кузе логалынат?

– Клуб вуйлатыше марте корнем кужу лийын. Ончыч профессий почеш штукатур-малярлан тыршенам, вара кондитерскийышке кусненам. Кандаш ий мӧҥгыштӧ шинченам – йочам онченам. Декрет деч вара, тораш каяш огыл манын, верысе кевытыш  пураш шонен пыштенам. Тидым ышташ мийыме кечын мый декем клуб вуйлатыше Зоя  Арсентьевна толын. Шкаланже алмаштышым кычалын улмаш. «Настя, тый весела улат, мутланаш йӧратет, тугеже ты пашам тылат ӱшанаш лиеш», – манын. Тыге кодшо ий 1 октябрь гыч тӱвыра пашаеҥ улам.

 Ты пашаште верыште улметла чучеш?

Тыге. Кажне паша кечем мылам куаным конда. Ончыч неле ыле: планым ыштен ом мошто, мероприятийым кузе эртарыман – ом пале. Эшежым отчётым йодыт. Эркын чылалан тунем шуынам. Еҥ-влак сайын канышт, нунын кумылышт сай лийже манын шонем. Да умбакыжат тидын верч тыршаш тӱҥалам.

Таче ялысе клуб кузе ила?

– Пандемийлан кӧра мероприятий-влак эртаралтын огытыл. Кызыт, эпидемий ситуаций изиш куштылеммек, коеш: еҥ-влак пайрем деч посна йокрокланеныт. Теве, шукерте огыл эртыше 8 мартлан пӧлеклалтше концертыште зал тич темын ыле.

Клуб ончычсо илышышкыже эркын пӧртылеш, концерт-влакым эртарена, ончерлам чумырена,  ваш ужын мутланаш полшышо вашлиймашат чӱчкыдын лиедат.

Самырык-влак дискотекым йӧратат. Уло кумылын конкурслаш ушнат.

Ӱдырамаш-влаклан «Одарушка» клуб уло. Тушко толшо-влак пидыт, ургат, курчакым ыштат. Йоча-влак «Шонанпыл» кружокышто сӱретлаш тунемыт, тӱрлӧ модыш дене модыт, шке коклаштышт конкурслам эртарат.

Руш калык мурым йӧратыше-влаклан «Зорюшка», марий сем почеш тавалташ кумыланлан «Олык сем» ансамбль-влак пашам ыштат.

Ончыч кугурак мероприятийым Эсмекпляк селасе, Кукшэҥер, Олыктӱр ялласе клубла дене пырля эртаренна. Умбакыжат тыгак лиеш манын ӱшанем.

 

­– Ме тый денет Марий самырык тукым слётышто палыме лийынна. Тый тыглай мероприятийышке икымше гана толынам манын палдаренат ыле. Тиде у опыт тылат пайдам конден?

Мылам, тыгай погынымашыште лийдыме айдемылан, ончыч йокрокын чучын. Но тиде шижмаш писын кораҥын. Пеш весела улмаш. Шуко уым пален налынам. Ты шинчымашым ончыкылык пашаштем кучылташ тӱҥалам.

Эн шерге опытшо, тиде вожылмашем, лӱдмашем сеҥымаш. Шке шонымашем пеҥгыдынрак каласаш тунемынам. Адакшым сай йолташ-влакым муынам.

– Настя, тугеже 25 мартысе пайремым икымше гана палемдаш тӱҥалат. Коллегет-влаклан тыланымашет лиеш?

–  Тӱвыра пашаеҥу деч уым кычалше, еҥ-влак дене вашкылым ыштен моштышо, виян айдеме. Тек кумылда эре волгыдо лиеш. Шонымашда шукталтеш. А эн тӱҥжӧ – таза лийза.

– Тау. Шушаш пайрем дене.

Тау!

О.МОШКИНА мутланен

Опубликовать в Одноклассники

Добавить комментарий