ИЛЫШ ЙЫЖЫҤ

«Сурт-пече» газетын 4-ше номерыштыже лудса.

«Сурт-пече» газетын 4-ше номерыштыже лудса.

Мучаш. Тӱҥалтышыже 2020 ийысе 1, 2, 3-шо №-ан газетыште.

Кеч Любам чылан сай ӱдыр семын паленыт гынат, шайтан алгаштарыме йӧратымаш пашалан уш шуко ок кӱл. Вет ял ола огыл, ик мучаште кычкыралат – вес мучашыш миенат шуэш. Кӧжӧ тидлан ӱшанен, кӧжӧ кокытеланен, а южыжо тудын нерген уда мутым шкежат вожылдымын шаркален…

Ялысе рвезе-шамычат Люба ӱмбаке йӱштын ончаш тӱҥалыныт. Митька веле пуйто, нигӧн шомакым колыштдымо гай, Любам вучыдымын йодаш толын.

– Кеч уло ял Василийын ойлымыжлан ӱшана гынат, мый тидлан ом ӱшане, –  маншын койын. – Тыйым садак йӧратен илем, марлан налаш тореш омыл манын. Но Люба тудым пӧрт гыч поктен луктын да шагат гыч шкежат ялым кудалтен каен.

Еҥ илышыш шӱшкылташ сай огыл, ну, мом ыштет… Ӱдырын поро чапшым уло ял ончылно тыге лавыраш тошкаш пуаш огыл манын, Люба ден Василийын эҥер серысе арама кокласе пытартыш вашлиймашыштым, мом кутырымыштым мый шке шинчам ден ужынам, пылышем дене колынам манын, колохоз гаражыште чыным луктын ойлаш вереште. А тылеч вара эн ончыч кӧ деч тыгай шакше манеш-манеш лекмым рашемдаш тӱҥальыч. Иктаж вич еҥ Митька деч манын каласышт. Садет пӧръеҥ-шамыч коклаште нигуш пураш ӧрмыж дене мераҥ иге гай лӱдын шогале да:

– Мынярлан налынам, тунарланак ужаленам, – шойышташ тӧчыш.

– Вара молан тылеч вара тудымак туларташ миенат? – Степан коча туран йодо. – Йӧратем мый Любам, тендан кутыркалымылан шӱвал шындем, – вашештыш Митька.

– А тыгай манеш-манешыжым, йӧратет гын, молан колтенат? – шоҥгыеҥ пижын веле.

– Могай манеш-манешым?

– Тый пелтортала койын шогылтын, ит аҥыртыл, вигак ойло – шонен муынат? – шым чыте мыят.

–Эше мо… Пеш кӱлеш.

– Ял мучкыжо мо иялан тыйгайжым ойлышт коштынат?

– А мо шып лийшаш улам ыле мо? – карал шындыш Митька

– Ах, тый шаргенче!.. – шоячым пераш Степан коча воктекыже миенат шогале, но тудым пӧръеҥ-шамыч кучен шуктышт.

Ялыште шкеж лӱм дене тыгай томаша шоякым пален налмекыже, Василий арня гыч шкеже пӧртыльӧ. Кастене ялыш толын шушо рвезе, шке мӧҥгыжӧ пурыдегече, вигак Митькамытын суртыш ошкылын… Тылеч вара шояк Митька тылзе наре какаргыше шинчан коштын, но тиде «пайда туныктымашым» нигӧ пуйто ужын огыл. Шукышт шоячылан тыгак кӱлеш манын, тудын дене йӧршын кутырымымат чарненыт. Тылеч вара тудлан колхоз гыч каяш йодмашым возашыже логале – кучаш ышна тӱҥал. Кид дечат кужу йылман шакше тыгай «айдеме-влак» ялыште огыт кӱл, а Василий ялеш кодо.

Кутырен чарнымекыже, туржалтше ик газетым кораҥден, весым луктын, тыгыде букван шаралтыме кагазым лудаш тӱҥале. Саҥга ӱмбаке кӱзыктен шындыме шинчалык йымачын поро кумылан шинчаончалтыш койылалтыш.

– … Садак нигузе Любам ом умыло… тыгай рвезе деч кораҥаш!

– Ала тудым ок йӧрате?! – йолташ ӱдыржылан вашештыш Галя.

– Йӧратен шында ыле, – ласкан мане председатель, – лишкырак пален налеш да чотак йӧратен шында ыле.

– Ну… йӧратымаш тиде – тыгай паша, – Галя йолташ ӱдыржӧ дене келшыш.

– Палем, шкежат тидын гоч йӱленак эртенам, – лугыч ыштыш пӧръеҥ, – тольык иктым каласен кертам: нине кок еҥ икте-весыштлан пӱралтынак улыт ыле… Моткоч жал… Шояклан верчын ты йӧратымаш тул ылыж шуктыде, жапше деч ончыч йӧрыш…

–  Ну, а Люба, чыла тидын нерген пален налын? – ӱдыр-влак иканаште йодыч.

–  А кузе уке гын, лӱмын тудын дек мый олаш коштынам. Чылажымат умылыш гай чучо, но шошым марлан лектым, ида вучо манме серышым тудын деч нална.

Р.ЧЕПКОВА ямдылен.

Опубликовать в Одноклассники

Добавить комментарий