Михаил ден Светлана Верёвкинмыт, сулен налме канышыш лекмекышт, Йошкар-Ола деч 20 километр ӧрдыжтырак верланыше Медведево район Кугуван ялыш илаш кусненыт. Михаил Михайловичын аважын сурт олмышкыжо. Тушто нуно суртым нӧлтеныт, моло оралтымат эркын чумыреныт, а тоштыжым кораҥден толыт. Мӱкш ончымо пашат Веревкинмытлан ача-авашт деч куснен. Нунышт мӱкшызӧ лийыныт. Михаил изинек аваж дене пырля отарышке коштын. Оза-влак куанен палемдат: кыдалаш уныкаштат ынде ты пашаште полшаш тӱҥалын…
Ты мужыр 39 ий пырля ила. Марийже Медведево районысо РОВД-н следственный управлений начальникше лийын, подолковник званийыште сулен налме канышыш лектын. Светлана Медведево районысо райпон ик кевытшым вуйлатен. Коктынат ответственный пашаште ыштеныт, сандене кызыт чон йодмышт почеш, Медведево посёлкышто пачерыштым шочшыштлан коден, ялыш, пӱртӱс лоҥгаш, илаш кусненыт. Чынжымак, тушто пеш сылне вер. Кугуваным ял манашыжат ок лий. Ончычшо тудо хутор семын ышталтын. Кызыт лу наре сурт уло, а телылан куд еш гына илаш кодеш. Оралтыжым кызыт тушто утларакшым даче семын нӧлтат.
Верёвкинмытын суртышт изи эҥер воктене шинча. Тудын гоч вигак чодыра коеш. Ошла эҥерыш йоген пурышо изи вӱдым суртоза икмыняр ий ончыч шкак пӱялен. Кызыт тудо кугурак ер семын койын шинча. Варажым тушко тӱрло колым колтен. Кызыт тушто колызылан, манмыла, рай. Умдыр, рак илат. Кеҥежым йӱштылшат шукын улыт. Михаил Михайлович шкежат, пушыш шинчын, тушто эрдене колым кучаш йӧрата. Кугурак уныкаштат тидлан кумылан. «Ала молан дыр колтымо карп-влак туланен огытыл. А теве нужгол шуко. Кол кучаш коштшо илалше кок ӱдырамаш эре таушта, — ойла Михаил Михайлович. Светланалан кучымо кол гыч кочкышым ямдылаш гына кодеш.
Кумданрак — «Марий Эл» газетын
2017 ий 11 ноябрьыште лекше номерыштыже лудын кертыда.
Светлана Носова.
М.Скобелевын фотожо.
