25 январьыште Российысе студент-влак пайремыштым палемдышт. Г.Константинов лӱмеш руш драме театрыште тидын лӱмеш шкешотан кас эртен.
Театрын фойешкыже пурен шогалмеке, ик жаплан кокла курымыш логалмыла чучын. Тушто, тудо пагытысе вургемым чиен, ӱдыр ден рвезе-влак коштыныт, икмынярын оркестрын семже почеш вальсыште пӧрдыныт. Вес лукышто йомак тӱняш пураш йӧн лийын. ПГТУ-н студентше-шамыч оҥай фотозоным келыштареныт. Кажне кумылан «Гарри Поттер» произведенийыште ончыктымо Хогвартсыш логалын, тӱҥ геройын юзо тояжым кучен ончен да кӧршӧкыштӧ Вуверын аяржым «шолтен».
А залыш погынышо-влакым весела концерт вучен. Тудын тӱҥалме деч ончыч студент-влакым Марий Эл вуйлатыше А.Евстифеев, республикын правительстве председательын икымше алмаштышыже М.Васютин, Йошкар-Олан да Марий Элын митрополитше Иоанн, МарГУ-н, ПГТУ-н, МОСИ-н ректорышт саламленыт.
Александр Александрович тунеммаште ойыртемалтше ӱдыр-рвезе-шамычлан Тауштымашым кучыктен. Ты награде дене ПГТУ-н механике ден машиностроений институтын студенткыже Татьяна Прохорова, МарГУ-н юридический факультетше гыч Дарья Шарова, МОСИ-н юридический факультетшын тунемшыже Роман Сафаргалиев палемдалтыныт.
Марий Эл вуйлатыше студент-шамычлан регионысо кадр резервышке пураш темлен, ӱмаште общественный инициативылан полышым пуымо толкынышто пашам ыштыше ӱдыр-рвезе-влаклан таум ойлен да нунын республикыште Самырык тукым форумым эртараш шонымашым сайлан шотлен.
Л.ШАБДАРОВА.
