Маристатын данныйже почеш, тений январь-апрельыште колышо-влак шочшо-шамыч деч шукынрак лийыныт, а мужыраҥше-влак ойырлышо-шамыч деч – шагалрак.
2017 ий январь-апрель дене таҥастарымаште тений тыгаяк жапыште 3,7 процентлан шуко еҥ колен, 8 процентлан шагал йоча шочын. Тичмаш налмаште илыш гыч кайыше-влакын чотышт ош тӱняш толшо-шамыч деч чырык утлараклан шукырак лийын.
Колымо амал тӱҥ шотышто вӱр коштмо системын черже, онкологий да моло: пуштмаш, шкем шке пытарымаш, корно-транспорт азапыш логалмаш – дене кылдалтын. Инфекциян да паразитан чер деч колышо-влакын чотышт 25,4 процентлан шукемын, онкологий дене – 1,9 процентлан, кочкышым шулыктарыме органын черже дене – 0,3 процентлан.
Тений январь-апрельыште 858 мужырым регистрироватлыме, 806 мужырым ойырымо. Мужыраҥме чот кодшо ий тыгаяк жап деч 8,9 процентлан иземын, ойырлымо чот – 1,1 процентлан.
М.ИВАНОВА
