Эртыше каныш кечылаште Йошкар-Оласе «Юбилейный» спорткомплексыште спорт гимнастике дене Олимпийский чемпион, сулло спорт мастер З.Воронина (Дружининам) шарныме лӱмеш турнир эртен.
Черетан всероссийский таҥасымашке элысе тӱрлӧ ола: Ижевск, Новочебоксарск, Самара, Саратов, Тольятти, Мурманск да моло кундем – гыч ятыр спорт гимнаст чумырген. Тыгай кӱкшытан турнир тений 15-ше гана эртаралтын.
Тале таҥасымаште Марий Эл гыч спорт мастер тӱшкаште Виктория Мухортова (2001 ий да кугурак-влак коклаште) икымше, Евгения Баскова (2002 ий, юниор-влак) кумшо лийыныт. Спорт мастерыш кандидат-шамыч коклаште Дарья Коробейникова кокымшо, Ксения Степанова кумшо верым налыныт, икымше разрядан-влак тӱшкаште Алёна Ямолова кокымшо, Ирина Пантелеева кумшо верыш лектыныт.
Снимкыште: Д.Коробейникова.
М.Скобелевын фотожо.