76 ийыш тошкалше спортсмен-ветеран Альберт Никишев спортын тӱрлӧ видыштыже: дзюдошто, самбошто, вольный кучедалмаште, куштылго атлетикыште, неле атлетикыште шке вийжым терген. Пеҥгыде кап-кылан, весела кумылан Альберт Михайлович ик кечын редакцийыш пурыш, спортышто сеҥымашыже-влакым шарналтыш, медальже-влакым ончыктыш, шкеж дене палдарыш.
— Мый Пошкырт кундем Калтаса район Калмаш ялеш шочынам. Спорт деке изи годсек шӱмаҥынам. Армий деч ончыч Хрущев жапыште мый Кустанай область Озеркино посёлкыш логалынам. Тушто верысе училищыште механизаторлан тунем лектынам. Самырык годым “Трудовые резервы” всесоюзный добровольный спорт обществыште шогенам. 1962 ийыште Кустанай областьыште кудымшо спартакиадыште выступатленам. Неле атлетикыште 180 кг нелытым н7лтен кертмем дене кокымшо верыш лектынам. Совет Армий деч вара 1967 ийыште “Урмалмаш” заводышто кум ий формовщиклан тунемынам. 1974 ийыште, Йошкар-Олаш куснымеке, пенсий марте стройкышто ыштенам. Тунам вет тыге лийын: пачерет кӱлеш гын, стройкышко каяш пернен.
— Теве Йошкар-Олаште кызыт кумдан палыме тренер Шакур Мансурович Гизатуллин дене пырля тренироватлалтынна, — шарналта спорт мастер. — 1976 ийыште Озаҥыш таҥасымашке Шакур Мансурович дене коктын миенна. Мый Дзюдо дене всесоюзный турнирыште индеш спорт-мастерым сеҥенам. Тидыжым эн кугу сеҥымашемлан шотлем. Кызыт спорт мастер лӱмым налаш куштылгырак. Тидым Йошкар-Олаште дзюдо дене ДЮСШОР вуйлатыше Шакур Гизатуллинат пеҥгыдемден кертеш. Тудын дене кызытат сай кылыште улына. Мыйым тудо “Туныктышем улат” манеш, тӱрлӧ таҥасымашыш ӱжеш.
Июнь мучаште Татарстан Республик Булгар олаште мастер-ветеран-влак коклаште самбо дене Российын чемпионатше эртен. Тушто Альберт Михайлович шке тӱшкаштыже (62 кг) кокымшо вер дене палемдалтын. Ты сеҥымашыж дене тале ветеран-спортсменым шокшын саламлена.
М.Скобелев
Авторын фотожо.
Снимкылаште: 9907—А.Никишев
