Тений 1 февраль гыч федеральный льготник-влаклан тылзе еда тӱлыман окса выплате 2,5 процентлан кӱзен. Тудым инвалид, сарын участникше, боевой действийын ветеранже, «чернобылец», тулык йоча, Йӱдвелыште илыше-влак да молат налыт. Россий Пенсий фондын палемдымыж почеш, тидлан 450,6 млрд. теҥгем ойырымо.
Тылеч посна тылзе еда тӱлыман окса выплатын радамышкыже пурышо социальный услуго наборат 2,5 процентлан индексироватлалтеш. Федеральный льготник-шамыч южо социальный услугым окса дене налаш праван улыт. Закон соцпакетын льготшо дене тичмашынат, ужашынат пайдаланаш йӧным пуа. Тыге, 1 февраль гыч соцпакетын кугытшо 1075 теҥгеат 19 ыр лийын, чумыржо 26 теҥгеат 22 ырлан «шергештын»: илышлан кӱлешан медикаментым ситарымылан 828 теҥгеат 14 ыр ойыралтеш, санаторно-курортный путёвкылан – 128 теҥгеат 11 ыр, ола воктенсе кӱртньыгорно, тыгак ола-влак кокласе чыла тӱшка транспорт дене эмлалтме верыш кудалаш да мӧҥгеш пӧртылаш – 118 теҥгеат 94 ыр.
2,5 процентланак колышым тояш ойырымо пособий кӱзен. Ынде тудо 5 701 теҥгеат 31 ыр лийын.
Тылеч посна прокуратурын да следствий комитетын отставкыште улшо пашаеҥышт кокла шот дене 30 процентлан кӱзыктымӧ пенсийым налыт. Тиде службо гыч кайыше пашаеҥ-влакын пенсийышкышт классан чинлан тылзе еда кокла шот дене 6-7 тӱжем теҥге ешартыш лиеш.
Февральыште йоча пособийын кугытшымат ончат, тудым кодшо ийысе инфляцийын показательжылан келшышын индексироватлат. Тений тиде коэфициент 1,025 шуын. Тыге, икшывым ончаш налмылан (усыновление) ик гана тӱлыман пособий 16350 теҥге олмеш 16759 теҥге лийын. Срочный службым эртыше военный-шамычын мӱшкыран ватыштлан выплате 25892 гыч 26539 теҥге марте кӱзен. Инвалид йочам ончаш налмылан (усыновление) 124929 теҥге олмеш 128000 теҥге ойыралтеш. А 1,5 ияш марте йочам ончымо шотышто пособий 3000 теҥге гыч 3142 теҥге марте кӱзен.
1 февраль гыч у сынан загранпаспортым 10 ийлан пуаш тӱҥалыныт. 100 тӱжем деч шукырак чотан олалаште да административный рӱдерлаште тудым шуко функциян рӱдерлаште пуышаш улыт, тидлан лӱмын ик окнам почаш темлыме.
М.ИВАНОВА.
